بەئامادەبونى بەڕێزان نێچیرڤان بارزانى، سەرۆکى حکومەتى هەرێمى کوردستان و، قوباد تاڵەبانى جێگرى سەرۆکى حکومەتى هەرێمى کوردستان و، پاڕلەمانتاران و وەزیر و لێپرسراوانى باڵا و، مامۆستایانى زانکۆ و توێژەران و ڕوناکبیران و بیرمەندان و نوێنەرى وڵاتان یەکەمین کۆنفرانسى هاوبەشى نێوان وەزارەتى خوێندنى باڵا و توێژینەوەى زانستى و، وەزارەتى ڕۆشنبیرى و لاوانى حکومەتى هەرێمى کوردستان دەستپێکرد.
لەو کۆنفرانسەدا کە، ئەمڕۆ بە دروشمى کۆنفرانسى" لێبوردەیى...ژیان، هەڕەشەى تیرۆر و ئەزمونى پێکەوە ژیان لە هەرێمى کوردستان" دەستپێکرد، لەسەرەتادا ئامادەبوان ساتێک بێ دەنگیان بۆ شەهیدانى ڕێگەى ڕزگارى کوردستان نا، پاشان چەند وتارێک پێشکەش کرا.
چی بکەین تا لە ڕوى فیکرى و سیاسى و پەروەردەییەوە کۆمەڵگەکەمان لە مەترسیەکان بپارێزین
د.یوسف گۆران وەزیرى خوێندنى باڵا و توێژینەوەى زانستى وتارەکەى بەخستنەڕوى چەند پرسیارێک دەست پێکرد و لەو بارەیەوە وتى: " ئەم کۆنفرانسە تایبەت بەلێکۆلێنەوە و شیکردنەوەى هۆکارەکانى توندڕەوى و وتارى پەڕگیرى ئیسلامى و هەوڵدان بۆ دۆزینەوەى ڕێگەچارەو چارەسەرەکانى، وتیشى دو ڕۆژ بەر لە ئەمڕۆ یادى لەدایکبوونى پێغەمبەرمان محمد (د.خ) بو، پێغەمبەرێک کە خودا لە ستایش و وەسفیدا بەخاوەن بەرزترین و جوانترین ڕەوشت ناساندویەتى، هەر خوداوەند لەبارەیەوە وتویەتى "کە تۆمان ناردوە، تەنها بۆ بەزەیى و بەخشندەیى نەبێ بۆ مرۆڤایەتى". لێرەوە حەقى خۆمانە بپرسین ئایا ئەوانەى ئەمرۆ بەناوى ئاینەوە خاوەنى دڕندەترین کردەوەو قێزەوەنترین ڕەوشتن، ئایا ئەمانە مافى ئەوەیان هەیە خۆیان بەشوێن کەوتوى هەمان ئەو پێغەمبەر بزانن؟! ئەوە چیە واى کردوە کە هەمان ئەو ئاینەى دوێنێ لە کۆمەڵگەى کوردى، کە سەرچاوەى بەخشندەیى و بەزەیى و لێبوردە بوە، ئێستا گروپێک، ڕەوت و ئاڕاستەیەک بێت و بەناوى هەمان ئاینەوە چى ناشرین و بێزراوە بەرامبەر بە مرۆڤەکان پیادەى بکات؟! ئەو جۆرە لە دیندارى لە چیە؟ و، چى دەیباتەوە سەر خانى و جەزیرى و نالى و مەولانا خالید و حاجى قادرى کۆیى و مەلاى گەورەى کۆیەو سەدان کەسایەتى و ناودارى ئاینى کوردى؟ چی بکەین بۆ ئەوەى لە ڕوى فیکرى و سیاسى و پەروەردەییەوە کۆمەڵگەکەمان لەو مەترسیانە بپارێزین؟ ئەمانەو چەندین پرسیارى تر کە هیوادارین لەو کۆنفرانسە بخرێتە بەرباس و لەلایەن پسپۆڕانەوە گفتوگۆى جدى لەبارەوە بکرێ، ئامانج لییى ئەوەیە بڵێین کە ئەوەى داعش و هاوشێوەکانى دەیکەن، لە باشترین حاڵەتدا جۆرێکە لە تێگەیشتنى دۆزەخى و توندڕەوانەى خۆیان بۆ ئیسلام و هیچى تر. بەکارهێنانى ئاینە لە ململانێیەکدا کە خۆى ئاینى نیە، شەڕکردنە بەچەکێک، کە لە بنەچینەدا بۆ کوشتن نیە، توقاندن و ترساندنە بەبەکارهێنانى پیرۆزییەک کە خۆى بۆخۆى بۆ ئاشتى و ڕێز لە مرۆڤ و مرۆڤایەتیە".
جەنگ لەگەڵ داعش جەنگێکە لەسەر بەها مرۆڤایەتیەکان
لە بەشێکى دیکەى وتارەکەیدا وەزیرى خوێندنى باڵا و توێژینەوەى زانستى وتى: "داعش سەرەتاى دەرکەوتنى توندڕەوى ئاینى و تێرۆر بەناوى ئیسلامەوە نیە، بێگومان کۆتاییەکەشى نابێت، بەڵام وەک چۆن پیشمەرگەکانى کوردستان بەپشتیوانى وڵاتانى هاوپەیمان توانیان پاشەکشە بەم هێزە دڕەندەیە بکەن، بەگیانى خۆیان ئێمەو کوردستانیشیان لە هێرشى وەحشیانەى ئەو هێزانە پاراست، بەهەمان شێوە ئەرکى زانستخوازان و ڕۆشنبیران و کۆمەڵگەى مەدەنى و سەرجەم دامەزراوە حکومیەکانیشە بەیەکەوە سەربارى هەر ناکۆکى و جیاوازییەک لەم ململانێیەدا یەک دەنگ و یەک هەڵوێست بن، چونکە ئەمە جەنگێکە کەس ناتوانێ خۆى لێ بەدور بگرێ، پەیوەندى نیە بەهێزێکى سیاسى، یان نەتەوە، یاخود ئاین و مەزهەبێک، بەڵکو پێش هەمو ئەوانە جەنگێکە لەسەر بەها مرۆڤایەتیەکان، لەم جەنگەدا یان بەیەکەوە سەردەکەوین و بەهاکانى مرۆڤبون دەپارێزین، یان تەسلیم بەهێزێک دەبین کە هیچ بەهایەکى مرۆیى نیە و، هیچ یاسایەک سنور بۆ ڕەفتارە دڕەندەکانى دانانێت. ئەم جەنگە ڕێک لەو جۆرە جەنگانەیە کە ئەگەر یەکیک هەبێت بڵێ پەیوەندیشى بەمەوە نیە، ئەوا بێگومان ئەوە جەنگەکەو ئەنجامەکانى پەیوەندى بەوەوە هەیە. ئەوەى داعش لە چەند ساڵى ڕابردودا کردى باى ئەوەیە توێژەران بۆ دەیان سال بەهەمو میتۆدە زانستیەکان شیکردنەوەى لەبارەوە بکەن، بپرسن ئەم هەمو وەحشیەت و دڕەندەییە لە کۆێوە دێت؟ بۆیە قۆناغى دواى داعش و سەردەمى دواى داعش وەک چۆن لەناوچەکەدا سەردەمێکى سیاسى تازەیەو کرانەوەى دەرگاى ڕودا و پێشهاتەکانە بەسەر چەندین ئەگەردا، بەهەمان شێوەش دەبێ هەمو ئازادیخوزان و دیموکراتخوازانى ناوچەکە، بەیەکەوە هەوڵبدەن بۆ نەهێشتنى زەمینەى سیاسى دەرکەوتن و گەشەکردنى داعش، چونکە داعش چەند بەرهەمى فیکرى توندڕەویى و پەڕگیریە، ئەوەندەش دەرئەنجامى واقیعیى سیاسى دواکەوتو و پەراوێزخستنە، دەبێ لە ڕوداوەکانى دەرکەوتنى داعشەوە فێرى ئەوە بوبین کە پەراوێزخستنى پێکهاتەیەکى مەزهەبى و نەتەوەیى، یان سەپاندنى دەسەڵاتێک لە دەرەوەى ویستى هاوڵاتیان، ژینگەیەکى لەبارو گونجاو بۆ گەشەکردنى تێڕواانینى تێرۆرستى و نامرۆییانە دروست دەکات، ئەو یاسا بایۆلۆژیەى پێمان دەڵێ جەستەیەک چەندە بۆ بەرگرى لاواز بێت، ئەوەندەش ئەگەرى ئەو بەهێزە بۆ وەرگرتنى ڤایرۆس و نەخۆشى کوشندە، بەهەمان شێوە فەزاو ژینگەى سیاسیش هەروایە، بگرە لاوازى جەستەیى خۆى نەخۆشیە، بەهەمان شێوە ئەو کاتەى سیاسەت وەک چالاکیەک ناتوانێ هەستى ئینتیما و بەشدارى هاوبەش و یەکسان لە نێوان پێکهاتە سیاسیەکان دروست بکات، بەر لەوەى هیچ ڤایرۆسێکیش لێى بدات، خۆى دوچارى پەتایەک دەبێ، کە ئەگەر چارە نەکرێ، باجى قورس و لێکەوتەى مەترسیدار بەدواى خۆیدا دێنێت".
هۆکارەکانى دەرکەوتنى گروپە تێرۆستیەکان جۆراو جۆرن
د. یوسف گۆران بەشێکى دیکەى وتارەکەى تەرخان کرد بۆ هۆکارەکانى سەرهەڵدانى گروپ و ڕەوتە تێرۆرستیەکان و لەو بارەیەوە وتى : "گومانى تێدا نیە جەنگ و ستەمکارى و نەبونى دیموکراسى و گەندەڵى و ناعەدالەتى و چارەسەرنەبونى کێشە سیاسیە هەڵواسراوەکانى ڕۆژهەڵاتى ناوەڕاست، بەشێکى سەرەکى هۆکارى دەرکەوتنى ئەم گروپە توندڕەوانەن، لە ئاستى ئێراقیشدا مانەوەى کێشە سیاسیەکان بەهەڵوەسراوەیى و دەرنەچون لە ئەقڵیەتى خۆسەپاندن و کۆنتڕۆڵکردنى کۆى جومگەکانى دەوڵەت، دۆخێکە چاوەڕوانى مەترسى زیاتریشى لێ دەکرێت، بۆیە یەکێک لە ڕێگە هەر سەرەکیەکانى نەهێشتنى ئەو ژینگە پیسەى کە داعش و هاوشێوەکانى تیایدا گەشە دەکەن، دەسکاریکردنى کێڵگەى سیاسیەو دروستکردنى ڕوحى ئینتیما و بەشدارى سیاسى هاوبەش و یەکسانە، بەڵام لێرەدا پێویستە ئەوەش بڵێین کە هیچ کات ئەم دۆخە سیاسى و ئابوریانە پاساو نین بۆ ئەم هەمو بێ بەزەیى و دڕندەییە، ئەم هێزە تیرۆرستیانە تەنها کوڕى واقعێکى سیاسى و ئابورى چەوت و ناتەندروست نین، بەڵکو لەهەمان کاتدا بەرهەمى فکرێکى توندڕە و دنیابینیەکى دۆگما و ئەقڵێکى نا ئەقڵانیە. گەلى کورد لەم سیاقە خاوەنى تراژیدیترین مێژوە، دەسەڵاتى داگیرکەرى بەعس بەهەمو شێوەیەک هەوڵى جینۆسایدکردنى داین، شوێن نەما کەولى نەکا، چەک نەما بەکارى نەهێنێ، بەڵام بزوتنەوەى ڕزگاریخوازى گەلى کوردستان سەربارى شەڕى مان و نەمانیشى لەگەڵ ئەو دەسەڵاتە فاشیە، هیچ کات بزوتنەوەیەکى تێرۆرستى نەبوەو نیە، هەر لە کاتى ڕاپەڕیندا بەهەزاران دیلى بەعس کەوتە دەست کورد، بەڵام بەوپەڕى میهرەبانى و لێبوردەیی ئازادکران، کەواتە بۆ تێگەیشتن لەم وتارە، جگە لە ژینگەو ئەو فەزا سیاسیەى لێوەى هاتوە، پێویستمان بەوردکردنەوەى خودى وتارەکەو ئەو ئەقڵیەتەشە کە لە پشتیەوە دەوەسـێ، کە وتارێکى ئاینى توندڕەوەو مێژوەکەى زۆر لە داعش و قاعیدەش دورترە".
"حەقیقەتى ئاینى لاى هەموانە و بەتەنها لاى کەسیش نیە"
هەر لە درێژەى وتارەکەیدا وەزیرى خوێندنى باڵا و توێژینەوەى زانستى باسى لە حەقیقەتى ئاینى لاى گروپ و مەزهەبەکان کرد و، لەو چوارچێوەیەشدا چەند نمونەیەکى جیاى هێنایەوە وتى: "کەلتورى ئیسلامى کە پڕۆسەیەکى مرۆیى مێژوییە، خاوەنى خاڵى گەشى ئەقڵانى و ڕوحانیە و بەهەمان شێوەش دیوى تاریک و کارەساتبارى تێدایە، چونکە مێژوى کۆمەڵگەو مرۆڤە، ئێمە لەم مێژوەشدا خاوەنى یەک تەفسیر و یەک وتارى ئاینى نین، بگرە زیادە لە وتار و مەزهەب و تێگەیشتنێک لە ئارادایە، ئەمە دۆخێکى سروشتیە و، لە هەمو ئاینێکدا بونى هەیە، کێشەکە ئەو کاتە دەست پێ دەکات کە وتارێکى سیاسى بێت و پێیى وابێت تەنها تێگەیشتنى ئەو ڕاستەو باقێەکەى گومڕاییە، لە کاتێکدا خودى ئەم وتارە بەرهەمى ململانێیەکى دنیایە لەسەر دەسەڵات، نەک حەقیقەتى ئاینى، چونکە حەقیقەتى ئاینى وەک مەولانا جەلالەدینى ڕومى دەیوت "لاى هەموانە و بەتەنها لاى کەسیش نیە"، پێش ئەویش ئیبن عەرەبى ئەوەى ساخکردۆتەوە کە حەقیقەتى خوایى لەوە گەورەترە مەزهەبێک بتوانێ بەتاقى تەنیا هەموى لەخۆبگرێ، بەڵکو ئەو ئەوەندە گەورەیە کە بەشى هەموان دەکات،بۆیە لە برى ڕق دەبێ یەکتریان خۆش بوێت، لەبرى فەتواى تەکفیر و پەلاماردانى مەزهەبى یەکترى، پێویستە سۆزو میهرەبانى نیشیانى یەکترى بدەن. لەم گۆشە نیگایەوە توندڕەوى جۆرێکە لە گومڕابون لە حەقیقەتى ئاین، دورکەوتنەوەیە لە شاڕێى ئیسلام و ڕێبازى پێغەمبەر محمد (د.خ). کەواتە وەستانەوە بەڕوى وتارى تێرۆرستى ئیسلامى بەر لەوەى بەرگریکردن لە بەها مرۆیى و ئازادى و ئاشتى و بەیەکەوەژیان بێت، ئەرکێکى ئاینیە، نیشاندانى ڕوى میهرەبانى ئیسلام و سەرلێشێوانى ئەوانەش کە دژى ئەو میهرەبانیەن، نابێ ئەوەشمان بیربچێ کە لەم ڕێگەیدا ژمارەیەک لە پیاوانى ئاینى و مەلا بەڕێزەکانە ڕۆڵى بەرچاویان هەبوەو هەیە لە نیشاندانى ڕوى ڕاستەقینەى ئیسلام ڕوى ناشرینى تێرۆرستانیش".
ڕوبەڕوبونەوەى تێرۆر ئەرکێکى گشتیە
د.یوسف گۆران ئەرکى ڕوبەڕوبونەوەى تێرۆر و تێرۆستانى بەرئەرکێکى دەستەجەمعى و گشتى وەسف کرد، بۆ ئەوەش وتى: "ئەمڕۆ کۆمەڵگەى مرۆیى لە سایەى گەشەکردنى تەکنەلۆژیاى پەیوەندى و کاڵبونەوەى سنورەکان، شتێک بەناوى مەترسى ناوچەیى و لۆکاڵى نەماوە، ئەوەى بۆ ئێرە مەترسیە، مەترسیە بۆ سەر ئەوێش، ئەوەش کە لە دورترین خاڵى جیهاندا ڕودەدات، ئێرەش بەخۆیەوە سەرقاڵ دەکات، لەم ڕەهەندەوە مەترسى تیرۆر گشتیەو ڕوبەڕوبونەوەشى ئەرکیکى گشتیە، لەم گۆشەنیکایەوە لەم کۆنفرانسەدا هەوڵمانداوە جگە لە ژمارەیەک لە کەسانى پسپۆڕ و شارەزاى ناوخۆ، پشت بەئەزمون و شارەزایى بیانیش ببەستین، چونکە هەروەک لەسەرەتادا ئاماژەمان پێدا ئامانجى گشتى ئەم کۆنفرانسە گەیشتنە بەوەڵام و چارەسەر بۆ توندڕەوى بەگشتى".
ئامانجى سەرەکى ئەم کۆنفرانسە تەنها گفتوگۆ نیە
لە کۆتایى وتارەکەشیدا وەزیرى خوێندنى باڵا و توێژینەوەى زانستى ئامانجى سەرەکى بەستنى کۆنفرانسەکەى خستەڕو لەو بارەیەوەش وتى: "بەو هیوایەى لە دو ڕۆژى کۆنفرانس و لە ڕێى پانێڵە هەمە جۆر و بەشدارى میوانانەوە بتوانین بەیەکەوە ببینە خاوەن دیدێکى یەکگرتوى زانستیانە بۆ کەمکردنەوەى مەترسیەکانى فکرى تێرۆر و، دواجار گەیشتن بەچارەسەر، کەواتە ئامانجى سەرەکى ئەم کۆنفرانسە بەتەنها گفتوگۆ نیە، بەڵکو ڕێکەوتنە لەسەر چەندین پێشنیاز و وەڵامێک کە بشێ دامەزراوە پەیوەندیدارەکان لەکارى داهاتویاندا کەڵکى لێ وەربگرن و ڕەچاوى بکەن".
بەستنى ئەو کۆنفرانسە بایەخى خۆى هەیە
هەر لە مەراسیمى کردنەوەى کۆنفرانسەکەدا، نێچیرڤان بارزانى سەرۆکى حکومەتى هەرێمى کوردستان وتارێکى پێشکەش کرد، لەسەرەتایى وتارەکەیدا دواى دەستخۆشیکردن لە وەزارەتى خوێندنى باڵا و توێژینەوەى زانستى و وەزارەتى ڕۆشنبیرى و لاوان بۆ بەستنى ئەو کۆنفرانسە، بەگرنگیەوە باسى لە کۆنفرانسەکە کرد وتى: "ئەو کۆنفرانسە بایەخی خۆی هەیە بۆ نەهێشتنی بیری توندتوتیژی و کارکردن بۆ زیاتر پێکەوەژیانی ئایین و کەلتورەکان لە هەرێمی کوردستان"، وتیشى لەم بۆنەیەدا پێویستە سڵاو بۆ گیانی پاکی شەهیدەکان بنێرین، کە بۆ هێشتنەوەی گیانی تەبایی و پێکەوەژیان و پاراستنی ئایینەکان و پێکەوەژیانی پێکهاتە جیاوازەکان، گیانی خۆیان بەخشی".
کوردستان لانکەى پێکەوەژیان بوە
لە بەشێکى دیکەى وتارەکەیدا سەرۆک وەزیرى هەرێمى کوردستان باسى لە میژو ئەزمونى پێکەوەژیانى هەرێمى کوردستان کرد و لەو بارەیەوە وتى: لەبەربەیانى مێژوەو کوردستان بۆتە لانکەى پێکەوەژیان و لەخۆگرتنى ئاین و پێکهاتە جیاکان، چونکە پێکەوەژیان یەکێکە لە خەسڵەتە هەرە گرنگی هەرێمی کوردستانە، هەروەک و پێویستى پاراستن و پەرەپێدانى ئەو پێکەوەژیانەى بەگرنگ زانى، ئەوەشى ڕاگەیاند ئەزمونی سەرکەوتوی پێکەوەژیانی ئایین و پێکهاتەکان بۆتە هۆی ئەوەی وڵاتانی دیکە بەگرنگەوە وەک نمونەیەکی زیندو باسی کوردستان بکەن.
دەبێ باوەڕ و متمانە بۆ کەلتوری پێکەوەژیان دروست بکەینەوە
لە بەشێکى دیکەى وتارەکەدا نێچیرڤان بارزانى وردتر باسى ئەزمون و کەلتورى پێکەوەژیان لەهەرێمى کوردستان کردو لەو بارەیەوە وتى: "کاتێک باسی ئەزمونی سەرکەوتوی پێکەوەژیان لە هەرێمی کوردستان دەکەین، دەبێت ئەو ڕاستییە بزانین کە هزرى توندوتیژی و، وتاری بیری تەسکی تێرۆر و، تاوانە تیرۆریستییەکان جینۆساید بەسەر ئایینەکانی هەرێمی کوردستاندا هاتون، بەتایبەتی کوردانی ئێزدی و مەسیحی"، وتیشى دەبێ ئەو ڕاستییە بزانین، ئەمانە کاریگەری خراپ و دو دڵی و بێ متمانەییان لەسەر کەلتوری پێکەوەژیان دروستکردوە، بۆیە ئەوەش ئەرکی ئێمەی قورسکردوە، لەبەرئەوە دەبێت لەڕوی سیاسی و کۆمەڵایەتی و پەروەردەییەوە کار بکەین تا باوەڕ و متمانە بۆ کەلتوری پێکەوەژیان دروست بکەینەوە.
بەڕێوەبردنى نەینەوا لە دواى نەمانى داعش لە ئێستا قورسترە
هەر لە وتارەکەیدا سەرۆک وەزیرى هەرێمى کوردستان باسى لە بەڕێوەبردنى نەینەوا لە دواى داعش کرد و، ئەو بەڕێوەبردنەشى بەئەرکێکى قورس و مەترسى وەف کردو لەو بارەیەوە وتى: "ئێمە دوپاتی دەکەینەوە کە بۆ موسڵی دوای داعش، ڕێککەوتنی سیاسی لەنێوان هەمو لایەنەکانی ئێراق و پێکهاتەکان پێویستە، چونکە ڕزگارکردنەوەی موسڵ لەڕوی سەربازییەوە ئاسانە، بەڵام لەڕوی کۆمەڵایەتی و پێکەوەژیانی ئایینەکان دەبێت کاری بۆ بکرێت، چونکە تا ئێستا هیچ نیازێکی جددی و خوێندنەوەیەکی واقیعبینانە نییە و خۆدزینەوە لەو بابەتەدا هەیە"، هەر لەو چوارچێوەیەدا وتى: ڕێککەوتنێکی واقیعبینیانە و دڵسۆزانە لەسەر جوگرافیا و دیمۆگرفیای ناوچەکە، کە لە هەمو پێکهاتەکان بێت زۆر گرنگە و، تاقە زامنی ئارامیە بۆ ناوچەکە، هەر ئەوەش دەبێتە ڕێگر لە کەوتنەوەی ئاگرێک، کە لەلایەن چەندین هێزی ناوخۆی و دەرەکی هەوڵی هەڵگیرساندنی دەدرێت، بۆیە دەبێت هەمو لایەنەکان پێشوەختە خەمی بۆ بخۆن بۆ ئەوەی ڕێگری لە کارەساتێکى لەو شێوەیە بکەین".
لەناوبردنى داعس تەنها بەشەڕی سەربازی نابێت
نێچیرڤان بارزانى وتیشیى شەڕی داعش و لەناوبردنیان تەنها بەشەڕی سەربازی نابێت، بەڵکو دەبێت بەرەنگاری بیری توندڕەوی ببینەوە، داعش هەوڵیدا دەسەڵاتەکانی فراونتر بکات، بەڵام شکستیان هێنا و دواجار نەمانی داعش لەسەر کات و ساتە، بەڵام بیرکردنەوەی داعشییەکان دەبێت لەناو ببرێت و بیرکردنەوەی تووندڕەوی داعش بنەبڕبکرێت.
لە کۆتایى وتارەکەشیدا جارێکى دیکە سەرۆک وەزیرى هەرێمى کوردستان دەستخۆشى لە وەزیرى خوێندنى باڵا و توێژینەوەى زانستى و، وەزیرى ڕۆشنبیرى و لاوان و ستافى سەرپەرشتیارو ڕێکخستن و بەڕێوەبردنى کۆنفرانسەکەى کرد و بەکۆنفرانسێکى پڕبایەخ هەڵسەنگاندنى بۆ کرد.
پاشان (هارى ڤان بۆمێل) (کى نۆت)ى کۆنفرانسى پێشکەش کرد، لە وتارەکەیدا ئاماژەى بەو نەهامەتى و دەردەسەرییانە کرد کە لەلایەن داعشەوە بەسەر خەڵکى ناوچە جیاکانى ئێراقدا هاتوە، هەروەک لە وتارەکەیدا ئاماژەى بەهۆکارە راستەقینەکانى گروپە توندڕەوییەکان کردو لەو، چوارچێوەیەشدا بەداتاو ئامار چەندین نمونەى هێنایەوە.
تابلۆى پێکەوەژیان
بەشى کۆتایى مەراسیمى کردنەوەى کۆنفرانس پێشکەشکردنى تابلۆی هونەرى (پێکەوەژیان) بو، کەلەلایەن گروپى هەڵپەڕکێى تیپە میللەکان-ى وەزارەتى ڕۆشنبیرى و لاوان پێشکەش کرا.
دوابەدواى کردنەوەى مەراسیمى کۆنفرانس، چالاکیەکان لە ڕێگەى پێشکەشکردنى پانێڵەکانەوە دەستیان پێکرد، واش بڕیارە لە ماوەى دو ڕۆژى کۆنفرانسەدا لەلایەن توێژەران و ڕۆشنبیران و بیرمەندانەوە خوێندنەوەى جیا بۆ لایەنەکانى پێکەوەژیان و چۆنییەتى ڕوبەڕوبنەوەى بیرى توندڕەوەى بکرێ.
