وەزیرى خوێندنى باڵا و توێژینەوەى زانستى ڕایگەیاند: لەبه ڕۆشنیاى بۆلۆنیا پرۆسێس کاردەکەین بۆ داڕشتنەوەى چوارچێوەى بڕوانامەکانى خوێندن و یەکەکانى خوێندن و ئاکامەکانى پرۆسەى خوێندن و فێرکردن لە زانکۆکان، بەشێوەیەک لەگەڵ سیستم و تایبەتمەندیەکانى خوێندنى باڵا لەسەدەى بیست و یەک هاوتەریب بێت.
ئەم ڕاگەیاندنەى د. ئارام محمد قادر وەزیرى خوێندنى باڵا و توێژینەوەى زانستى لەمیانى کۆبونەوەیەکدا هات لەگەڵ وەفدێکى ڕێکخراوى یونسکۆ، کە لەدیوانى وەزارەت بەڕێوەچوو.
لەو کۆبونەوەیەدا کە هەریەک لە ڕاوێژکار و بەڕێوەبەرانى گشتى وەزارەت و یاریدەدەرى سەرۆک زانکۆ پۆلیتەکنیکیەکان ئامادەیبون، سەرەتا (رۆرى رۆبێرت تشاد) بەڕێوەبەرى نوسینگەى یونسکۆ بەوەکالەت و بەڕێوەبەرى پڕۆژەى چاکسازى خوێندن و ڕاهێنانى پیشەیى و تەکنیکى و (د. ئان کاثرین ئیسحاق) شارەزاى نێودەوڵەتى لە بوارى سیستمى بۆلۆنیا لە دوو وتەى جیادا سوپاسى وەزیرى خوێندنى باڵا و توێژینەوەى زانستیان کرد بۆ ئەم دەرفەتە، دواتر باسیان لە ئەنجامدانى سێ وۆرک شۆپ لە زانکۆ پۆلیتەکنیکیەکانى (هەولێر، سلێمانى و دهۆک) کرد، کە ئامانج لە سازکردنى ئەم وۆرک شۆپانە جێەجێکردن و بەرەوپێشچونى هەنگاوەکانى جێبەجێکردنى سیستمى بۆلۆنیا بوە لە زانکۆ پۆلیتەکنیکیەکان، وتیشى بابەتەکانمان لەبوارى بەرەو پێشبردنى پرۆگرامەکان و تواناکان و چۆنیەتى دۆزینەوەى هەلى کار و پێشخستنى بوارى پیشەیى کە بازاڕى کار پێویستیەتى، هەروەها گرنگى دان بە بوارى تەکنیکى و خوێندنى پیشەیى لە هەرێمى کوردستان.
لەلایەن خۆیەوە د. ئارام محمد قادر وەزیرى خوێندنى باڵا و توێژینەوەى زانستى سوپاس و بەخێرهاتنى وەفدى ڕێکخراوى یونسکۆى کرد و ڕایگەیاند: یونسکۆ لەڕابردوو بۆ وەزارەتەکەمان هاوکارو هەماهەنگ بوە، بەڵام ئەوەى دەیبینین بەهۆى قەیرانى دارایى و شەڕى دژ بە داعش و کۆمەلێک بابەتى دیکەوە، پەیوەندیەکانمان وەک پێویست نەبونە، بەڵام ئێستا قۆناخێکى تازەیەو دۆخى هەرێمى کوردستان و عێراق بەرەو پێشچونى باشترى بەخۆیەوە بینیوە، بۆیە بە بایەخەوە لە پەیوەندىیەکانمان لەگەڵ ڕێکخراوى یونسکۆ دەڕوانم و ئامانجمانە ئەو پەیوەندیانە لەسەر ئاستى فراوانتر و پرۆژەى نوێتر پەرەپێبدەین، بۆ ئەمەش وەزیرى خوێندنى باڵا و توێژینەوەى زانستى ڕایگەیاند: دەمانەوێت پڕۆژەکانى یونسکۆ لەمەودوا بەشێوەیەک بێت لەگەڵ ستراتیژى وەزارەتەکەمان بەتەواوى یەکانگیر بێت و خۆى لە سێکتەرى خوێندنى باڵا بەباشى ببینێتەوە، بەتایبەت لە بوارەکانى چەسپاندنى دڵنیاى جۆرى و متمانە بەخشین و جێبەجێ کردنى بۆلۆنیا پرۆسێس و ڕیفۆرمى خوێندنى تەکنیکى لە زانکۆ پۆلیتەکنیکیەکان.
لە کۆتایى قسەکانیدا وەزیرى خوێندنى باڵا و توێژینەوەى زانستى دوپاتیکردەوە لەبه‌ر ڕۆشنیاى بۆلۆنیا پرۆسێس کاردەکەین بۆ داڕشتنەوەى چوارچێوەى بڕوانامەکانى خوێندن و یەکەکانى خوێندن و ئاکامەکانى پرۆسەى خوێندن و فێرکردن لە زانکۆکان، بەجۆرێک لەگەڵ سیستم و تایبەتمەندیەکانى خوێندنى باڵا لەسەدەى بیست و یەک هاوتەریب بێت.
لە بەشێکى دیکەى کۆبونەوەکەدا هەریەک لە ڕاوێژکار و بەڕێوەبەرانى گشتى وەزارەت و یاریدەدەرانى سەرۆکى زانکۆ پۆلیتەکنیکیەکان باسیان لە کارەکانى یونسکۆ لەبوراى خوێندنى باڵا و جێبەجێکردنى سیستمى بۆلۆنیا لە زانکۆ پۆلیتەکنیکیەکان و فراوانکردنى ئەم پڕۆژانە کرد.
