وەزیرى خوێندنى باڵا و توێژینەوەى زانستى ڕایگەیاند: بەڕێوەبردنى ڕیفراندۆم بەبێ بەشدارى ناوچە دابڕێندراوەکان نەخشەى دەوڵەتى کوردستان بەتەواوەتى دروست نابێ و، لەداهاتوشدا مافمان نابێ داواى ناوچە دابڕێندراوەکان بکەینەوە.
دەوڵەتى کوردستان لە ڕوانگەى ئەکادیمییانە و پێکەوەژیانى ئاشتیانە
ئەو وتانەى د.یوسف گۆران وەزیرى خوێندنى باڵا و توێژینەوەى ئەمڕۆ چوارشەممە، ڕێکەوتى (١٧/٥/٢٠١٧) لە میانەى پێشکەشکردنى سمینارێکیدا هات، کە بەناونیشانى (دەوڵەتى کوردستان لە ڕوانگەى ئەکادیمییانە و پێکەوەژیانى ئاشتیانە) لە هۆڵى کۆبونەوەکانى زانکۆى جیهان پێشکەشیکرد.
لەسەرەتای سمینارەکەدا، د.نەوزاد باجگر سەرۆکى ئەمیندارانى زانکۆى جیهان لە وتەیەکیدا بەخێرهێنانى وەزیرى خوێندنى باڵا و توێژینەوەى زانستى و، ئامادەبوانى کرد، هەروەک کورتەیەکى لەبارەى زانکۆکەیان و ستراتیژى زانکۆکەیان بۆ گفتوگۆکردن لەبارەى دەوڵەتى کوردستان و کێشەو ئاستەنگەکانى بەردەم ئەو پڕۆسەیە خستەڕو، وتیشى کارەکانمان بەردەوام دەبێت و، دواتریش کۆى سمینارەکان لە چوارچێوەیەک بەناونیشانى تێڕوانینى ئەکادیمیستەکان بۆ دەوڵەتى کوردى پێشکەشى سەرجەم لایەنەکانى دەکەن.
پاشان سەرۆکى زانکۆى جیهان/هەولێر لە وتەکدا ڕاگەیاند: ئەم سیمنارەى د.یوسف گۆران کە پانێڵى چواردەمى زانکۆکەیانە و، ڕونیشیکردەوە ئەم پانێڵەى وەزیرى خوێندنى باڵا و توێژینەوەى زانستى لە چوارچێوەى زنجیریەک لە پانێڵ و سمینار دێ، کە لە ڕێکەوتى( ١٧/١١/٢٠١٦) دەستیان پێکردوە.
وەزیرى خوێندنى باڵا لە ڕوانگەى سیاسى و یاسایى خوێندنەوەى بۆ بابەتەکرد
د.یوسف گۆران وەزیرى خوێندنى باڵا و توێژینەوەى زانستى لەسەرەتاى پێشکەشکردنى سمینارەکەیدا، دواى بەخێرهێنانى ئامادەبوان دەستخۆشى لە زانکۆى جیهان کرد بۆ بەڕێوەبردنى ئەو زنجیرە سمینارە، وتیشى خۆشحاڵم ئەمڕۆ قسە لەسەر بابەتێکى هەنوکەیى و هەستیار لە ڕوى ئەکادیمیەوە دەکەم، وتیشى لە سمینارەکەمدا لە لایەنى سیاسى و لایەنى قانونى خوێندنەوە بۆ بابەتەکە دەکەین.
ئایا دیدى یاسایى و نەتەوەیى بۆ سەربەخۆى هەیە؟
لە ڕوى سیاسیەوە، وەزیرى خوێندنى باڵا و توێژینەوەى زانستى وتى: دەبێ لە سەرەتادا بزانین کە ئێمە لە چ ژینگە و بارودۆخێک دەژین؟ ئینجا دەبێ بزانین گرنگى ئەم بابەتە لە ئێستادا بۆ ئێمە چیە؟ پاشان چەمکى سەربەخۆى و چەمکى دەوڵەت لە ڕوى قانونى دەوڵەتى و قانونى دەستورى چۆن پێناسە دەکرێ؟ چونکە دەتوانین لەو ڕوانگەیەوە سودیان لێ وەربگرین بۆ ئەوەى لە داهاتودا دیدێکى یاسایى و دیدێکى نەتەوەیمان بۆ بابەتەکە هەبێ.
ڕۆڵى وڵاتە بکەرە عەرەبیەکان لە ناوچەکە شکاوە و تا ئێستاش خۆى نەگردۆتەوە
وەزیرى خوێندنى باڵا و توێژینەوەى زانستى باسى لە بارودۆخى ناوچەکە کرد و لەو بارەیەوە پرسیارى کرد و وتى: ئێستا ئێمە لە لە ڕۆژهەڵاتى ناوڕاست چ دۆخێکین؟ ئایا ئەو دۆخە یارمەتیدەر دەبێ بۆ سەربەخۆى؟ ئایا دەرفەتى ئەوە هەیە دەوڵەتى تازە بێتە سەر ئەو شانۆى سیاسى لە ناوچەکە؟، د.یوسف گۆران وتى: هەمومان ئەزانین کە هەمو بکەرێکى نێودەوڵەتى دەبێ دەرفەت بۆ خۆى بدۆزیتەوە، ئەگینا ناتوانێ ڕۆڵى لە شانۆى سیاسى بگێرێ، زیاتر لەو بارەیەوە وەزیرى خوێندنى باڵا و توێژینەوەى زانستى وتى: ڕۆژهەڵاتى ناوەڕاست لە دواى ساڵى (١٩٩١)ەوە گۆڕانکارى زۆرى بەسەردا هاتوە، دەوڵەتە بکەرەکان گۆڕانکارى زۆریان بەسەرداهاتوە، چونکە دەوڵەتە عەرەبیەکان لە جامیعەى عەرەبى یان مسر و سعودیە ئەو ڕۆڵەى جارانیان نەماوە، بۆیە دەبیننی ئێستا شتێک بەناوى مەنزمونى عەرەبى نەماوە، هەربۆیە دەبینین ڕۆڵى وڵاتە عەرەبیەکان لاواز، د. یوسف گۆران لاوازبونى ئەو دەوڵەتانەى بەدەسکەوت بۆ کورد ئەژمارکرد و وتى: لاوازبونى دەوڵەتەکان بوە هۆکارێک بۆ ئەوەى خەڵکى کوردستان لە ساڵى (١٩٩١)شتێک بکات و حکومەتى هەرێمى کوردستان دابمەزرێنێ و بەرەوپیش بچێ، بەڵام پیشتر ئەمە قبول نەدەکرا، وەزیرى خوێندنى باڵا و توێژینەوەى زانستى وتى: یەکەم داتا پێمان دەڵێ لە ساڵى (١٩٩١)ەوە ڕۆڵى وڵاتان و بکەرە عەرەبیەکان لە ناوچەکە شکاوە و تا ئێستاش خۆى نەگردۆتەوە.
تورکیا سیاسەتى بادانەوە بەرەو ڕۆژهەڵات جێبەجێ دەکات
سەبارەت بە وڵاتانى دراوسێش، د.یوسف گۆران ڕونکردنەوەى زیاترى لەبارەى وڵاتانى دراوسێ خستەڕو و ڕایگەیاند: لە دەوروبەرى کوردستان دو دەوڵەتى سەرەکى هەیە، یەکەمیان وڵاتى تورکیا، وتى تورکیا لە دواى ساڵى (١٩٩١) ڕۆڵى لە ڕوداوەکان هەبوە، بەڵام زیاتر ڕۆڵەکەى ڕۆڵێکى ئەمینى بوە، نەک سیاسى، وتیشى لە دواى ساڵى (٢٠٠٣) ئاڕاستەى سیاسى ئەردۆگان بەرەو ڕۆژئاوا بو نەک ڕۆژهەڵات، بەڵام لە دواى ساڵى (٢٠٠٥) بەرەو ڕۆژهەڵات ئاراستەکەى بەبەهێزى گۆڕى، وتیشى تورکیا دەوڵەتێکى گرنگە لە ناوچەکە، بۆیە زۆر گرنگە مامەڵەمان لەگەڵ تورکیا هەبێ، چونکە دەخوازێ ڕۆڵى لە سیستمى سیاسى و ئەمنى و ئابورى ناوچەکە هەبێ، وەزیرى خوێندنى باڵا و توێژینەوەى زانستى وتى: ئێستا دەبینین تورکیایەکى زۆر کارایە و ڕۆڵى لە سوریا و ئێراق و وڵاتانى دیکەى ناوچەکە بەڕێژەى یا هەیە، د.یوسف گۆران ڕاگەیاند: ئێستا تورکیا سیاسەتى بادانەوە بەرەو ڕۆژهەڵاتى هەیە، هەربۆیە مەسەلەى کورد بەلاى تورکیاوە تەنها مەسەلەیەکى ئەمنى نیە وەک جاران، بەڵکو سیاسى و ئابوریشە، لەو چوارچێوەیەشدا، د.یوسف گۆران وتى: بونى پەیوەندى باش لە هەمو لایەنەکان لەگەڵ تورکیا ڕۆڵى گرنگى و چەمسەرى دەبێ، وتیشى نابێ سەیرى دەوڵەت بکەین، کە کێ حکومى دەکات، چونکە تواناى دەوڵەت وەک خۆى دەمێنیتەوە، لەبەرئەوە نابێ بەلاى گرنگ بێ کێ حوکمى تورکیا دەکات، بەڵکو دەبێ لە جوگرافیایى سیاسیەوە لە ڕۆڵ و تواناى دەوڵەت بڕوانین.
چاوەڕێ مەکەن لە ئێران دەسەڵاتێ بێتە سەر حکوم ئاراستەى سیاسەتى لە وڵاتانى ناوچەکە بگۆڕێ
سەبارەت بەڕۆڵ و تێڕوانینى ئیڕان لە ناوچەکە، وەزیرى خوێندنى باڵا و توێژینەوەى زانستى ڕاگەیاند: ئێران بەهەمان شێوە دەوڵەتێکى کاریگەرە، هەربۆیە لە دواى لە دواى ساڵى (١٩٩١)ەوە وڵاتە زلهێزەکان و وڵاتانى ئەوروپا سیاسەتى جۆراو جۆریان بەکارهێنا و، هەوڵێاندا پێگەى لە ناوچەکە نەمێنى، بەڵام کۆمارى ئیسلامى ئێران بەو ڕێکەوتنە توانى هەندێ ئابڵۆقەى سیاسى لە خۆى دور بکاتەوە، بۆیە دەبینین ئێستا ئێران ڕۆڵى کاریگەرى لە ناوچەکە هەر ماوە، وتیشى ئەو ڕۆڵەى ئێستا ئێران لە ناوچەکە هەیەتى هى ئێستا نیە، بەڵکو دەگەڕێتەوە بۆ سەردەمى دەوڵەتى ماد، وتیشى لەوساوە تا ئێستا بۆیە ئاراستەى کارکردنى زیاتر بەرەوە ئێراق و وڵاتانى کەنداو بوە، چونکە زیاتر لە (٢٠٠٠) هەزار ساڵ زیاترە ئێراق و کەنداو بەشوینى کارکردنى خۆى ئەزانێ، وەزیرى خوێندنى باڵا و توێژینەوەى زانستى وتى: چاوەڕێ مەکەن لە ئێران دەسەڵاتێ بێتە سەر حکوم ئاراستەکەى بگۆڕێ، وتیشى کاریگەر و بونى ئێران لە ناوچەکە بۆ ئەوەیە تا دەسەڵاتى لە ناوچەکە زیاتر بەهێز بکات بەتایبەت لە سوریا و ئێراق، بۆیە کورد بیەوی و نەیەوێ دەکەوێتە ژیر کاریگەرى ئەو وڵاتانەوە.
ڕوسیا دەیەوێ دەرفەتێکى زیندو لە ڕۆژهەڵات بۆخۆى بدۆزێتەوە
بۆ ڕۆڵی ڕوسیاش لە هاوکێشە سیاسیەکانى ناوچەکە، وەزیرى خوێندنى باڵا و توێژینەوەى زانستى وتى: لە کاتى ڕوخانى بلۆکى ڕۆژهەڵات، ئێستا ڕوسەکانن دەیانەوی دەربکەونەوە و ڕۆلیان هەبێ، چونکە زۆر لەو وڵاتانەى کە پیشتر سەر بە یەکێتیى سۆڤیەت بون، ئێستا لە ناتۆن، هەربۆیە ڕوسیا وا هەست دەکات کە چواردەورى دەدرێ، د.یوسف گۆران وتى بۆ دەربازبون و گەڕانەوەى ڕۆڵى جارانى ئێستا ڕوسیا دەیەوێ لە ڕۆژهەڵاتى ناوەڕاست دەرکەوێ، بۆیە دەبێ بەلامانەوە شتێکى ئاسایى بێ کە دەستوەردانى ڕوسیا لە سوریا زۆر توندە، چونکە دەیەوێ دەرفەتێکى زیندو بۆخۆى بدۆزێتەوە، وتیشى ئەوە چەندە بۆ سوریا ڕاستە بۆ کوردى سوریاش هەر ڕاستە، بۆیە دەبێ کە دەوڵەت دروست دەکەین لە تێڕوانینى ئەو زلهێزانە بزانین و، تێ بگەین و پەیوەندى دروستمان لەگەڵیان هەبێ.
کورد و ئەمریکا لە بەها و هێڵە گشتیەکان هاوکۆکن
وەزیرى خوێندنى باڵا و توێژینەوەى زانستى بەشێکى سمینارەکەى تەرخانکرد بۆ ڕۆڵى ویلایەتە یەکگرتوەکانى ئەمریکا و لەو باریەوە وتى: ئەمریکا ئەو گۆڕانکاریانەى لە ئێراق و ئەفگانستان ئەنجامیدا ڕاستە پەیوەندى بە لەناوبردنى تیرۆەوە هەیە، بەڵام ئامانجى سیاسى خۆشى هەیە..بەڵام ئێستا قسە زۆرە، کە ئایا ئەمریکیا یارمەتیەکانى بۆ کوردى ڕاستە یان نا؟ پاشان ئایا کورد لە ئەولەویاتى کارەکانى ئەمریکا؟ د.یوسف گۆران وتى: لە ڕاستیدا ئایە ئێمە ئەتوانین ببینە یاریکەرێکى وا، کە یارمەتى جێبەجێکردنى پلانە ستراتیژیییەکەى ئەمریکا بدات؟ گرفتى ئەمریکا لە سوریا ئەوەیە، کە ئەوان گەیشتنە ئەو ڕاستیەى، کە جگە لە کورد کەسێکى وا نادۆزنەوە کە متمانەى پێ بکەن، وتیشى مامەڵەشیان لەگەڵ کورد پەیوەندى بەوەوە نیە کە متمانەیان بەکورد هەیە، بەڵکو پەیوەندى بەبەها هاوبەشەکانیان لەگەڵ کورد هەیە و، لە هیڵە گشتیەکان هاوکۆکین، د.یوسف گۆران ڕاشگەیاند: ئەمەشیان پەیوەندى بەدلسۆزى کوردەوە هەیە، چونکە پێکهاتەى سیاسى کورد لەگەڵ پێکهاتەى سیاسى ئەمریکا دەگونجێ، بۆ نمونە لە هەندێ وردەکارى کە پەیوەندى بەبەها سیاسى و ژیارییەکانى هەردولاوە هەیە هاوبەشین لەگەڵیان، ئەوەش وا دەکا هەماهەنگ بن.
ئەگەر دەوڵەتمان بوێ، نابێ کێشە ناوخۆییەکان بەهەڵپەسێردراوى بهێڵینەوە
وەزیرى خوێندنى باڵا و توێژینەوەى زانستى هەر لە میانەى پێشکەشکردنى سمینارەکەیدا باسى کێشە ناوخۆییەکانى هەرێمى کوردستانى کرد و لەو بارەیەوە وتى: بۆ ئەوەى بتوانین دەوڵەت و سیستمێک دروست بکەین، دەبێ بزانین چۆن لە سیاسەتى دونیا تێ دەگەین؟ هەروەک چۆنیش لەناوخۆى خۆمان کیشەکانمان چارەسەر دەکەین؟ چونکە ئەو دو بابەتە کاریگەرى زۆرى لەسەر ئامانجەکانمان و ناو و ناوبانگ و تێڕوانینى ئێمە دەبێ، بۆ ئەوەش د.یوسف گۆران باسى لە تێڕوانینى وڵاتان بۆ پێشمەرگە کرد و ڕایگەیاند: ئەگەر وڵاتانى زلهێز متمانەیان بە پێشمەرگە نەبوایە نەداهاتن پڕۆژەى هاوبەشیان بۆ وەزارتى پیشمەرگە هەبێ! وتى: ئەوان هەست نەکەن کە هێزیک هەیە و دتوانرێ ڕێکبخرێتەوە نەدەهاتن ئەرکى ڕێکخستنەوەى بگرنە ئەستۆ، د.یوسف گۆران ڕاشگەیاند: ڕێکخستى هێز لە یاسا نێودەوڵەتیەکان کارێکى زۆر هەستیارە، وتیشى ئەمە فاکتەرێکى زۆر دڵخۆشەکەر، بەڵام ئەگەر بێت و کێشەکانى دیکەمان چارەسەر نەکەین دەبێت هۆکارێکى خراپ بۆ گەلەکەمان و بەدیهێنانى ئامانجەکان، لەو وچارچێوەیەشدا وەزیرى خوێندنى باڵا و توێژینەوەى زانستى باسى لە خراپى کارانەکردنەوەى پاڕلەمان کرد و وتى: زۆر گرنگە بۆ ئێمە لەو بابەتە تێ بگەین، چونکە تێڕوانینى ڕۆژئاوایەکان بۆ پارلەمان زۆر گرنگە، لاى ئەوان پاڕلەمان بریتیە لە سەرچاوەى یاسادانان و نوێنەرایەتیکردنى خەڵک، بۆیە لاى ئەوان کێشە لەسەر ناوەکان نیە، بەڵکو لاى ئەوان چەندە گرنگە پابەندنى یاسا و بەهاکان بین، بۆیە ئەگەر لە کارانەکردنەوەى پاڕلەمان بەردەوام بین، ئەوان وا هەست دەکەن ئێمە لە بەهاکان لەگەڵیان هاوبەش نین.
ڕەزامەندى خەڵک لە حکومەت بۆ سەربەخۆى زۆر گرنگە
هەر سەبارەت بەکێشەکانى ڕیفراندۆم و سەربەخۆى د.یوسف گۆران وتى: یەکێکە لە کێشە ناوخۆییەکانى دیکەمان قەیرانى دارایى، چونکە ئاماژەکانى ڕەزامەندى خەڵک دەبێتە هۆکارى ڕازیبونى خەڵک لە حکومەت، بەڵام دەبینین ئێستا بەشێکى زۆرى خەڵک لە بارى دارایى و سیستمى بەڕێوەبردنى حکومەت نارازین، وتیشى ناڕازیبون ترسى نا سەقامگیرى دروست دەکات.
بەردەوامى کێشەکان لەگەڵ بەغداد بۆتە هۆى ئەوەى کورد بیر لەسەربەخۆى بکاتەوە
سەبارەت بەکیشەکان لەگەڵ حکومەتى ئێراقى، د.یوسف گۆران وتى: ئێمە کێشەمان لەگەڵ بەغداد هەیە، ڕونیشیکردەوە لە ساڵى (٢٠٠٥) کاتێک کە هاوبەشیمان کرد لە دانانى سیستمێک بەناوى فیدراڵى، بەڵام ئەم سیستمە ئێستا کار ناکات، چونکە ئێراق دەوڵەتیکى یاساى نیە و لەسەر بنەماى یاسایى دروست نەکراوە، ئەگەر یاسایى بوایە کێشەکان لەسەر بنەما یاسا دانراوەکان چارەسەر دەکران، وەزیرى خوێندنى باڵا و توێژینەوەى زانستى ڕایگەیاند: ئێستا هەرێمى کوردستان کێشەیەکى زۆرى لەگەڵ ئێراق هەیە، هەرئەوەش وا کردوە، کە بیر لە سەربەخۆى بکاتەوە، چونکە هەست بەوە ناکەین کە وەک هاوڵاتى پلە یەک لە ئێراق تەماشا دەکەین، بۆ کێشەکانیش وەزیرى خوێندنى باڵا و توێژینەوەى زانستى ئاماژەى بەیەکێک لە کێشەکان کرد و وتى: لە دەستوردا هاتوە سیاسەتى خوێندن و فێرکردن لە دەسەڵاتى هەرێمەکاندایە، بەڵام تا ئێستا حکومەتى ئێراقى دان بە بەشێک لە زانکۆکانماندا نانێت... وتیشى ئەوەش پەیوەندى بەئەقڵیەتى بەڕێوەبردن لە ئێراق هەیە، لەبەر ئەوە د.یوسف گۆران وتى: دەبێ شێوازى مامەڵەکردنمان لەگەڵ ئێراق بگۆڕین، ڕاشگەیاند: ئەنجامدانى ڕیفراندۆمیش هەر بۆ ئەو مەبەستەیە.
دەبێ ناوچە دابڕێندراوەکان سنورى کوردستان دەستنیشان بکەن
سەبارەت بەکێشەکانى ڕیفراندۆم بەتایبەت لەناوچە کوردستانیەکانى دەرەوەى ئیدارەى هەرێمى کوردستان، وەزیرى خوێندنى باڵا و توێژینەوەى زانستى وتى: ئەگەر بوینە دەوڵەت نزیکەى ١٠٠٠ کیلۆمەتر لەگەڵ ئێراق هاوسنور دەبین، بۆیە دەبێ پەیوەندییەکى باشمان لەگەڵیان هەیە، بەڵام رێفراندۆم گرفتیکى یاسایى و سیاسى هەیە، بۆ نمونە ئایا ڕیفراندۆم بە ناوچە دابڕێندراوەکانەوە دەکەین، یان بێ ناوچە دابڕێندراوەکان؟ د.یوسف گۆران ڕایگەیاند: ناوچە دابڕێندراوەکان سنورى کوردستان دەستنیشان دەکەن، بۆیە ئەگەر ڕیفراندۆمان لەم ناوچانە نەکرد سبەى مافمان نابێ داوایان بکەینەوە، بۆیە دەبێ بەر لە ڕیفراندۆم ئەو کێشەیە چارەسەر بکەین و، هەوڵ بدەین ئەوان ببنە بەشێک لە ڕێفراندۆمەکە، چونکە ئەوە مافى ئەوانە و، پارلەمانی ئێراقیش ناتوانێ قسەى لەسەر بکات.
بۆ ڕیفراندۆم نە پاڵپشتیەکى ڕون و نە دژایەتیەکى ڕون هەیە
بۆ ڕەهەندە نێودەوڵەتیەکانى ئەنجامدانى ڕیفراندۆم، وەزیر خوێندنى باڵا و توێژینەوەى زانستى وتى: ئێمە لاى خۆمان بڕاندۆمانەتەوە کە ئەنجامدانى ڕیفراندۆم مافى خۆمانە، وتیشى لە ڕوى دەرەکیەوە نە پاڵپشتیەکەى ڕون و، نە پشتیوانیەکى ڕون بۆ ئەو بابەتە هەیە، جگە لە وڵاتانى ئێراق و تورکیا و ئێرانى کە قسەى ڕاستەوخۆیان لەسەر کردوە و دژایەتیان بۆ کردوە، د.یوسف گۆران وتى: ئێمە ئێستا کێشەى بەنێودەوڵەتیکردنى ڕیفراندۆمان هەیە، بۆیە دەبێ ئەو بابەتە بکەینە بابەتیکى زیندو لەگەڵ وڵاتە زلهێزەکان و وڵاتانى تورکیا و ئێران و ئێراق باسى بکەین.
ڕیفراندۆم کێشەى هەرێمى و جیهانیمان بۆ دروست دەکات
لە بەشێکى دیکەى قسەکانیدا، وەزیرى خوێندنى باڵا و توێژینەوەى زانستى وتى: ئایا جگە لە ڕیفراندۆم ، میکانزمیکى دیکە هەیە دەوڵەتى پێ ڕابگەێنین و، ئەو ترسەش لاى وڵاتانى دراوسی بڕەوێنینەوە؟ بۆ ئەوەش ئاشکرایکرد: کە بابەتێک هەیە بەناوى کۆنفیدراڵى، کە هەم دەوڵەتە و هەمیش دەوڵەت نیە، ئەوەى لەگەڵ سێنتەر کۆى دەکاتەوە تەنها سەرۆک یان پادشایە، وتیشى جگە لە سەربەخۆى پێم وایە بیر لە پێشنیازى دیکەش بکەینەوە باشترە، چونکە ئەو ڕیفراندۆمەى دەکەین کێشەیەکى هەرێمى و جیهانیمان بۆ دروست دەکات، لەبەرئەوە ئێمەى کوردیش قسەیەک ناکەین کە جێبەجێى نەکەین بۆیە..
ئەگەر دەرفەتەکە نەقۆزینەوە، هەوڵەکانمان بەفیڕۆ دەڕوات
لە کۆتایى قسەکانیدا، د.یوسف گۆران وەزیرى خوێندنى باڵا و توێژینەوەى زانستى ڕایگەیاند: ڕۆژهەڵاتى ناوەڕاست لە قۆناخى دروستکردنەوەیەدایە، دەوڵەت و هەرێمى تازە دروست دەبێ، بۆیە ئێمە لەو ماوە ڕاگوزە دەتوانین شتێک بکەین، بەڵام ئەو ماوەیە تەواو بو ئێمە هیچمان پێ ناکرێ، چونکە ئەو کێشانە نەنیشتۆنەتەوە بەڵام ئەگەر وڵاتە بەهێزەکان ڕێکەوتن لەسەر شێوازى بەڕێوەبردنى ڕۆژهەڵاتى ناوەڕاست ئەوکات هیچ بەهیچ ناکەین و هەوڵەکانمان بەفیرۆ دەڕوات و و دەرفەتەکانیشمان لەدەست دەڕوا، لەبەرئەوە هاودەنگی نیشتمانی بەپێویست زانى، ڕاشگەیاند: هەر کاتێک توانیمان هیڵە گشتیە نەتەوەیەکانمان دەستنیشان کرد، ئەوکات سەرەتایى دروستبونى دوڵەتى کوردى دێتە کایەوە.
لە کۆتایى سمینارەکەشدا، چەند پڕسیارێک ئاراستەى د.یوسف گۆران وەزیرى خوێندنى باڵا و توێژینەوەى زانستى کرا، ئەوەش وەڵامى وردى پرسیارەکانى دایەوە.
