كەریم كابان، پیاوێک لەپەڕەی گوڵ
كەریم كابان هونەرمەندێكی گەورەی كوردستانە‌و خزمەتی زۆری بەكاروانی هونەریی گۆرانیی كوردی كردووە‌و شوێن پەنجەی بەنوێكردنەوەو گەشەپێدانی ئەو هونەرەوە دیارە.
(كەریم جەلال مەحموود) ناوی تەواوی ئەم هونەرمەندەیە‌و بە كەریم كابان ناسراوە.
ساڵی 1927 لە گەڕەكی مەڵكەندیی شێخانی شاری سلێمانی لەدایك بووە.
مامۆستا كەریم لەئامێزی بنەماڵەی كاباندا گەورە بووە، كەبنەماڵەیەكی دیارو ناسراوی شاری سلێمانین‌و چەندین كەسایەتیی گەورەی سیاسی‌و كۆمەڵایەتی‌و روناكبیری‌و هونەرییان تێدا هەڵكەوتووە‌و خزمەتێكی زۆریان بەكاروانی تێكۆشانی كوردایەتی‌و هونەری‌و روناكبیری كردووە.
مامۆستا كەریم كابان رۆڵەی ئەو ماڵباتە رۆشنگەر‌و روناكبیرەیە‌و لەژێری شەپۆلی كاریگەری ئەوان بەگشتی‌و خانەوادە دەنگخۆشەكەیدا بەتایبەتی پەروەردە بووە، هەر لەقۆناغی خوێندنی سەرەتاییەوە خولیای هونەری گۆرانی بووە‌و بەشداری چالاكییە هونەرییەكانی قوتابخانەكەی كردووە.
ساڵی 1941 یەكەم گۆرانی وتوە. رادیۆی ئینگلیزەكان لەسلێمانی‌و رادیۆی كوردی بەغدا‌و رادیۆی شۆڕشی ئەیلول سێ دەروازەی گرنگ بوون بۆ ئەوەی دەنگی كابان سنوری شارەكەی ببڕێت‌و لەسەرانسەری كوردستانی گەورەدا دەنگ بداتەوە.
دواتریش لەرێی تیپی مۆسیقای سلێمانی‌و كەناڵەكانی دیكەی دەنگ‌و رەنگی میدیا‌و بەهۆی دەنگە بەسۆز‌و رەسەنەكەیەوە، زیاتر ناسراو جێگەی لەدڵ‌و دەروونی خەڵكی كوردستاندا كردەوە.
ئەم هونەرمەندە گەورەیە سەرباری خزمەت‌و بەخششە زۆرەكانی لەكایەی هونەردا، لەمەیدانی تێكۆشانی كوردایەتیشدا شوێنی دیارە‌و پیاوێكی كوردپەروەر‌و بەهەڵوێست بووە‌و هەر بۆیەش رووبەڕووی راونان‌و نەفیكردن بۆتەوە، بەڵام ئەوانە كۆڵیان پێنەداوە‌و لەگەڵ كاروانی تێكۆشانی كوردایەتی لەشار‌و شاخ رێی كردووە‌و خۆشترین گۆرانییەكانیشی (یاران وەسێتم‌و شەو) لەسەردەمی شاخ‌و لەرێی تیپی مۆسیقا‌و رادیۆی شۆڕشەوە پەخشكران‌و خەڵكی كوردستانیان سەرسام كرد.
ئەگەرچی مامۆستا كەریم كابان دەرچووی هیچ دەزگا‌و دامەزراوەیەكی هونەری نەبووە‌و نزیكەی بیست گۆرانیشی هەیە، بەڵام بەهۆی ئەوەی خاوەن دەنگێكی رەسەن‌و ئەفسوناوی‌و خاوەن سەلیقە‌و ستایلی تایبەتی خۆی بوو، بووە ئەو هونەرمەندە گەورەیەی كەجێی شانازیی هەموان بێت.
بەداخەوە ئەم هونەرمەندە گەورەیەی كوردستان لە رۆژی 14ی كانوونی دووەمی 2016 لەشاری سلێمانی كۆچی دوایی كرد.
بەڵام بەهۆی خزمەت‌و گۆرانییە خۆش‌و دەنگە بەسۆزەكەیەوە هەمیشە بەنەمری ئەمێنێتەوە.
درودی رێزو وەفاو ئەمەكداری بۆ گیانی پاك‌و پیرۆزی كابانی هونەرمەندی مەزن.
پێش نیوەرۆى رۆژى یەک شەممە ٢-١٢-٢٠١٨ شاندێکی وەزارەتی رۆشنبیری و لاوان کە پێکھاتبوو لە بەرێزان ( خەلیل عەبدوڵڵا ) بەرێوەبەری گشتیی دیوان و (محەمەد گەردی )بەرێوەبەری گشتیی راگەیاندن و (مەسعود مستەفا) راوێژکاری یاسایی وەزارەت ، سەردانی کونسڵخانەی کۆماری پۆڵەندایان لە ھەولێر کرد و لە دیدارێکدا لەگەڵ سەرکونسڵ و جێگری سەرکونسڵ ،باس لە گەشەپێدانی پەیوەندییە کلتورییەکانی نێوان گەلی کوردستان و گەلی پۆڵەندا کرا.
ڕێزلێنانی وەزارەتی ڕۆشنبیری و لاوان بۆ تەلار ھیرانی پتر لە مانایەکی ھەیە
د سالار عوسمان: تەلار ھیرانی ھونەرمەندێکی دیار و مرۆفدۆستێکی کەموێنەیە
لە ڕێوڕەسمێکی شایستەدا، شاندێک لە وەزارەتی ڕۆشنبیری و لاوانی حکومەتی ھەرێمی کوردستان، لە ماڵەکەی خۆیدا سەردانی ھونەرمەندی شانۆکار تەلار ھیرانی کرد و ڕێزلێنانی وەزارەتی ڕۆشنبیری و لاوانیان پێشکەیش کرد لە بەرامبەر بەخشینی گورچیلەیەک بە براکەی.
بریکاری وەزارەت د سالار عوسمان لە ڕورەسمی ڕێزلێنانەکەدا گوتی: تەلار ھیرانی بەم ھەنگاوە گەورە ئینسانییەی سەلماندی کە ھەر ھونەرمەندێکی دیار و چالاک نییە، بەڵکو مرۆڤدۆستێکی کەموێنەیشە و ئێمە لە وەزارەت شانازیی بە خانمی ئاوا چالاک و کارا و مرۆڤدۆست دەکەین و ڕێزلێنان لەم خانمە پتر لە مانایەکی ھەیە و پێشتریش ھەر لەو خانەوادەیە برایەک و خوشکە گەورەکەیشی خەرمان ھیرانی ھونەرمەند بە ھەمان شێوە گورچیلەیان بەخشیوە، بۆیە دەبێ ھەموو لایەک، بە تایبەت وەزارەتی ڕۆشنبیری و لاوان بە ڕێزەوە لە تەک ئەم وێنە ئینسانیانە بوەستێت و ڕێزیان لێبنێت .
لە بەرامبەریشدا تەلار ھیرانی سوپاس و پێزانینی خۆی پێشکەیشی وەزارەتی ڕۆشنبیری و لاوان کرد و ھیوای خواست ئەم جۆرە چالاکییە نەوعیانە بەردەوام بن .
شایەنی باسە لەلایەن شاندەکەی وەزارەتەوە وێڕای ڕێزلێنان و گوڵ و گۆرانی و خوڵقاندنی سروتێکی جوان ، ھیوایان خواست کە تەلار ھیرانی و براکەی و تەواوی خانەوادەکەیان سەلامەت و تەندروست بن و بەردەوام بن لە خزمەت و بەخششە .کلتوری و ھونەرییەکان
