لە چوارچێوەی چالاکییە بەردەوامەکانی یەکەی یەکسانی جێندەری، لە وەزارەتی داد، رۆژی ٢ی ئاداری ٢٠٢٠، کۆڕێک بۆ خاتوو/ نەواڵ عەبدوڵڕەحمان، فەرمانبەری وەزارەتی داد و هەڵگری بڕوانامەی ماستەر لە بواری یاسای نێودەوڵەتی، سازکرا .
لە کۆڕەکەدا کە دادوەر، عەبدوڵڕەحمان حەمە کەریم، بەڕێوبەری گشتی داد و بەدرەدین بەرزنجی، دادوەری داواکاری گشتی و سەرۆکی لیژنەی بڕیاری١٣٢٥ و ژمارەیەک لە بەڕێوبەران و فەرمانبەرانی دیوانی وەزارەتی داد ئامادەیی بوون، خاتوو نەوال، لە دیدێکی رەخنەگرانەی پرسیارئامێزەوە، تیشکی خستە سەر چەند لایەنێکی قانوونی بڕیاری ١٣٢٥ی ئەنجوومەنی ئاسایشی نێودەوڵەتی، تایبەت بە پاراستنی ئافرەتان لە سەردەم و لە پاش بڕانەوەی ململانێ چەکدارییەکاندا .
خاتوو نەوال، بە پرسیارێکی گرنگ دەستی پێکرد و وتی کە "ئافرەت کێیە و بۆچی دەچەوسێنرێتەوە، تا پێویستی بەوە هەبێت کە لە توندوتیژییەکان بپارێزرێت؟ ئایە لە کێ دەپارێزرێت و چۆن دەپارێزرێت و؟ ئایە ئەو میکانیزمانەی کە بڕیارەکە دایناوە تا ئێستا توانیوێتی ئافرەت بپارێزێت؟ بۆچی ئافرەت ناتوانێت خۆی بپارێزیت؟ دووپاتیشی لەوەکردەوە کە دەبێت ئافرەتان خۆیان بتوانن، مافەکانی خۆیان بپارێزن و لە خودی خۆیاندا سەرچاوەکانی هێزی خۆیان بدۆزنەوە.
دواتر پێناسەیەکی توندوتیژی کرد و چەندین نموونەی لە بارەی ئەو توندوتیژیانە هێنایەوە، کە لە مێژوودا بە بەرنامە و بە پشت بەستن بە چەندین بیروڕا و فەلسەفە، دەسەلاتداران و پیاوان، ئافرەتیان تیایدا چەوساندۆتەوە، ئاماژەی بەوەشدا کە میکانیزمەکانی بڕیاری ١٣٢٥ دووپات کردنەوەیە لەو مافانەی کە لە ناو پرتۆکۆڵ و رێککەوتننامەکانی جنێف ی ساڵانی ١٩٦٧ و ١٩٧٧ دا هاتووە، ئەوەشی خستەڕوو کە ململانێکانی ئەم دە ساڵەی رابردوویی خۆرهەڵاتی ناوەڕاست سەلماندوێتی کە بڕیاری ١٣٢٥ نەیتوانیوە، لە کاتی ململانێ سیاسی و چەکداریی و شەڕەکانی تایفی و نەژادیی، ژن و منداڵان لە ئاگری جەنگ و توندوتیژی ئایدۆلۆژی و ئاینی و تایفی بپارێزێت، لەوەدا باسی قەتڵوعامکردنی ئێزیدییەکان و فرۆشتنی ژن و کچە ئێزیدییەکانی کرد لەلایەن داعشەوە .
خاتوو نەوال، لە دریژەی باسەکەیدا پرسیاری ئەوەی کرد کامانەن ئەو ئامرازانەی پاراستن کە بڕیارەکە دایناوە و؟ کوان ئەو دەزگایانەی کە جێبەجێی دەکەن؟، ئایا لە عێراق چۆن جێبەجێ دەکرێت؟ داوای کرد کە پێویستە جەوهەر و فەلسەفەی ١٣٢٥ شۆڕببێتەوە بۆ ناو تەشریعاتی عێراقی و هەرێمی کوردستان و زۆر گرنگە ئافرەتان هۆشیاریی زیاتریان هەبێت بە یاساکان و بە مافە دەستوورییەکانیان، ئاماژەی بەوەشدا کە هێشتا لە دارشتنی یاساکاندا جیاکاری بەرانبەر ئافرەت هەیە، لەوەدا ئاماژەی بە بابەتی میرات دا و ئاماژەی بە شایستەدان بە مرۆڤ دا، بە تایبەت لە یاسای باری شارستانی.
خاتوو نەوال، لەو بابەتەیدا بەو ئەنجامە گەیشت کە دەرکردنی یاسای ١٣٢٥ خۆی بۆخۆی پێشکەوتنێکی باشە، بەڵام هێشتا پیادەکردنی جیاکارییە بەرانبەر ئافرەت، بەڵام بۆ پاراستنی ئافرەتانی کۆمەڵگە تازە پێگەیشتوەکانی رۆژهەڵاتی ناوەڕاست و ئەفریقیا باشە، دەتوانین بڵێین بڕیارەکە دەرگەیەکی بچووکە بۆ مافەکانی ئافرەت و پێویستە زۆر یاسا لە هەرێمی کوردستان هەمواربکرێتەوە بۆ ئەوەی بتوانین کەڵکێكی باشتر لە بڕیاری ١٣٢٥ ببینین .
لە کۆتایی کۆڕەکەدا، هەریەک لە بەڕیزان دادوەر،عەبدولڕەحمان حەمە کەریم و دادوەر/ بەدرەدین بەرزنجی، سەرپەرشتیاریی یەکەی یەکسانی جێندەری و ژمارەیەک لە بەڕیوبەرانی وەزارەتی داد، سەرنج و تێبینی و دیدی خۆیان بە گشتی خستەڕوو، سوپاس وستایشی نەوال خان و بابەتەکەی کرا و وەک بابەتێکی بەپێز و سەرنج راکێش پەسەند کرا .
