به‌ بڕیارى په‌رله‌مانى كوردستان- عێراق له‌ ساڵى (1996) به‌ڕێوه‌به‌رایه‌تى رۆشنبیرى ئاشوورى له‌ هه‌ولێر دامه‌زرا‌.

له‌ مانگى ته‌مووزى ساڵى (1998) له‌ شارۆچكه‌ى عه‌نكاوه‌ بەرێوەبەرایتەکە كرایه‌وه‌.

 دواتر له‌ هاوینى ساڵى (2007) له‌سه‌ر داواى نوێنه‌رانى ئه‌و كاته‌ى پێکهاتەى سریان له‌ په‌رله‌مان ناوه‌كه‌ى گۆڕدرا بۆ به‌ڕێوه‌به‌رایه‌تى رۆشنبیرى و هونه‌رى سریانى- هه‌ولێر.

 پاشان بەبڕیارى  په‌رله‌مان و ئه‌نجومه‌نى وه‌زیران بڕیاردرا بە‌ به‌رزكردنه‌وه‌ى پله‌ى به‌ڕێوه‌به‌رایه‌تییه‌كه‌ بۆ به‌ڕێوه‌به‌رایه‌تى گشتى.

به‌ڕێوه‌به‌رایه‌تى گشتى رۆشنبیرى و هونه‌رى سریانى له‌ هه‌رێمى كوردستانى عیراق دامه‌زرا له‌ به‌روارى (23 تشرینى یه‌كه‌م 2007) دواتر‌ به‌ڕێوه‌به‌رایه‌تى( رۆشنبیرى و هونه‌رى سریانى هه‌ولێر) خرایه‌ پاڵ به‌ڕێوه‌به‌رایه‌تى گشتى.

 دواى سێ مانگ  له‌به‌روارى (19)ى شوباتى ساڵى ( 2008 ) باڵه‌خانه‌ى به‌ڕێوه‌به‌رایه‌تى گشتى رۆشنبیرى و هونه‌رى سریانى له‌ شارۆچكه‌ى عه‌نكاوه‌ كرایه‌وه‌, دواى دابیین كردنى پێداویستییه‌كانى و دامەزراندنى ژمارەیەک ‌ فه‌رمانبه‌ر بۆ بەرێوەبەرایتەکە.

 دواى ساڵێک لە كردنه‌وه‌ى  به‌ڕێوه‌به‌رایه‌تی‌ گشتی, دواتر له‌ پارێزگاى دهۆكش  به‌ڕێوه‌به‌رایه‌تى رۆشنبیرى و هونه‌رى سریانى-دهۆك  لە (١) ى نیسانى ساڵى ( 2008 ) کرایەوە .

 دواى  تێپه‌ڕبوونى سێ مانگ  و له‌ ئه‌یلولى ساڵى (2009)به‌ڕێوه‌به‌رایه‌تى كه‌له‌پوورى  و هونه‌رى میللى سریانى له‌ شارۆچكه‌ى عه‌نكاوه‌ كرایه‌وه‌ .

  به‌ڕێوه‌به‌رایه‌تییه‌ گشتیی سریانى  به‌ نیازه‌ به‌ڕێوه‌به‌رایه‌تى سێیه‌م له‌ شارى سلێمانى بەناوى( به‌ڕێوه‌به‌رایه‌تى رۆشنبیرى و هونه‌رى سریانى- سلێمانى) بكاته‌وه‌.

 به‌ڕێوه‌به‌رایه‌تییه‌ گشتییه‌كه‌مان ده‌زگایەکى فەرمى حكومییه‌, یه‌كێكه‌ له‌ (9) نۆ به‌ڕێوه‌به‌رایه‌تى گشتیەکانى وه‌زاره‌تى رۆشنبیرى ولاوان له‌ هه‌رێمى كوردستانى عیراق.

 پێكهاته‌ى به‌ڕێوه‌به‌رایه‌تییه‌ گشتییه‌كه‌مان بریتییه‌ له‌ بەشەکانى( شانۆ و موسیقا و میدیا و هونه‌رى شێوه‌كارى و رۆشنبیرى منداڵان و چاپ و بڵاوكردنه‌وه‌ى گۆڤارى بانیبال) ئەمە جگه‌ له‌ به‌شه‌كانى (كارگێڕى) (به‌ڕێوه‌به‌رایه‌تى كارگێڕى و خۆیه‌تى) و (به‌ڕێوه‌به‌رایه‌تى ژمێركارى) و به‌شى( نه‌خشه‌دانان و به‌شى خزمه‌تگوزارى) ئامانجمان بوژاندنه‌وه‌ى كه‌له‌پوور رۆشنبیرى نه‌ته‌وه‌كه‌مان كه‌ بۆ سالانێكى زۆر فه‌رامۆش كرابوو, هه‌روه‌ها پێشخستنى هونه‌ر و ئه‌ده‌ب و رۆشنبیرى و ناساندنى به‌ گه‌لى كورد و گه‌لى عێراق و گه‌لانى تر.

 جگە لەوەش  ئامانجى کارکردنمان پاڵپشتكردنى هونه‌رمه‌ندان و لاوانى سنورى بەرێوەبەرایەتى و شارۆچکەى عەنکاویە , هەروەها یارمه‌تى دانیان بۆ بڵاوكردنه‌وه‌ى به‌رهه‌مه‌ ئه‌ده‌بییه‌كانیان و نمایشكردنى شانۆگه‌رییه‌كانیان و كردنه‌وه‌وى پێشانگاى هونه‌رو پێشخستنى بوارى وەرزش و وشیارکردنەوەى لاوان و یارمەتیدانیان لە پێشخستنى تواناو بەهرەکانیان.