چراکانی نیشتمان 

حاجی قادری كۆیی

حاجی قادری كۆیی شاعیرێكی گەورەی نەتەوەیی‌و نیشتمانی كوردستانه‌و بەشیعرە بەرزەكانی داوای زانست‌و زانیاریی كردووە‌و هانی رۆڵەكانی گەلەكەی داوە كە خەبات بۆ بنیاتنانی دەوڵەتی سەربەخۆی كوردستان بكەن.
حاجی قادری كۆیی كە دووسەدە لەمەوبەر هاتۆتە دنیاوە‌و لەسەردەمی ئەودا بیری نەتەوەیی لاواز بووە، ئەو لەو كاتەدا بەپێشەنگی بیری نەتەوەیی دادەنرێت‌و بەشیعرەكانی خەباتی كوردایەتی جۆش داوە.
عەبدولقادر كوڕی مەلا ئەحمەد كوڕی مەلا ساڵح كوڕی مەلا ئەحمەدی گەورەیە ناوی ته‌واوی ئه‌م شاعیره‌یه‌و لەبواری ئەدەبدا بەحاجی قادری كۆیی ناسراوە.
ساڵی 1816 لەگوندی (گۆڕ قەرەج)ی خوارووی رۆژئاوای شاری كۆیە لەدایك بووە.
لەكۆیە‌و باڵەكایەتی‌و سەردەشت‌و مەهاباد‌و شنۆ خوێندنی ئاینی خوێندووە‌و ئیجازەی مەلایەتی وەرگرتووە، بەڵام پیشەی مەلایەتی نەكردووە.
ساڵی 1884 رووی كردۆتە ئەستەنبوڵ‌و تا كۆتایی ژیانی لەوێ‌ بووە.
هەرچەند حاجی قادر هەر لەسەرەتای ژیانی لاوییەوە خولیای شیعر‌و ئەدەب بووە‌و شیعری دڵداری‌و كۆمەڵایەتی‌و نەتەوەیی نوسیوە، بەڵام شاری ئەستەنبوڵ بەو پێگە شارستانی‌و مەعریفییەوە، كاریگەری زۆری لەسەر حاجی هەبووە‌و زاخاوی بیری نەتەوەیی‌و كوردایەتی داوەتەوە‌و نایابترین شیعرە نەتەوەییەكانی لەوێ‌ نوسیوە.
هەموو شیعرەكانی حاجی لەدوو توێی دیوانێكدا بەناوی دیوانی حاجی قادری كۆیی چەند جارێك چاپ ‌و بڵاو كراوەتەوە.
حاجی قادر بەپێی رۆژنامەی كوردستان لە20ی ئایاری 1897 كۆچی دوایی كردووە‌و لەشاری ئەستەنبوڵ بەخاك سپێردراوە..
درود و رێزو وەفا بۆ گیانی پیرۆزی حاجی قادری كۆیی شاعیری گەورەی نیشتمانی‌و نەتەوەیی.