دیداری رۆشنبیرى
کوردی ، ئەڵمانی بەرێوە دەچێ
وڵاتى ئەڵمانیا : سپۆنسەرى ژمارەیەک چالاکى رۆشنبیرى و کولتورى هاوبەش دەکات
وڵاتی ئەڵمانیا لەڕێگای پەیمانگای (غۆتە) و ڕێکخراوی (گیز) یارمەتی وەزارەتی ڕۆشنبیری و لاوان دەدات بۆ ئەنجامدان و بەرێوەچوونی ژمارەیەک چالاکی کولتوری و ڕۆشنبیری.
ڕۆژی 2018/4/11 بەرێزی (خالید دۆسکی) وەزیری ڕۆشنبیری ولاوان لە ئۆفیسی تایبەتی خۆی پێشوازی لەبەرێز (تۆماس کویسلر) شارەزا لەبواری ڕوشنبیری لەپەیمانگا (غوتە)ى ئەڵمانى کرد.
ئامانج لەسەردانی نوێنەری پەیمانگای (غوتە) گەیاندنی زانیارو وردەکارییەکانی چالاکییەکانی ڕێکخراوەکەبوو بۆ وەزیری ڕۆشنبیری کە بڕیارە لەئایندەیەکی نزیک لەکوردستان ژمارەیەک چالاکی ڕۆشنبیری و کولتوری ئەنجام بدەن.
دەسپێکی چالاکییەکانی پەیمانگاکەیان، هێنانی تیمێکی ڕاوێژکاری ئەڵمانیە و ئەنجامدانی وۆرک شۆپێکە بەئامادەبوونی نوێنەرانی دام و دەزگاکانی وەزارەت.
ئامانج لە وۆرک شۆپ ئاڵوگۆڕکردنی زانیارییە دەربارەی چۆنیەتی ئەنجامدانی چالاکی کولتورییەکانە کە ووڵاتی ئەڵمانیا لە ڕێگای ڕێکخراوی (گیز) و پەیمانگای (غۆتە) سپۆنسەری دەکات.
بۆ ئەم مەبەستە بەرێز وەزیری ڕۆشنبیری وێرایی سوپاسکردنی گەل و حکومەتی ئەڵمانیا لەپای هاوکاری و پاڵپشتیە بەردەوامیەکانیان بۆ گەلی کوردو حکومەتی هەرێم ، ئامادەیی و دڵخۆشی وەزارەتی نیشاندا بۆ سەرخستنی پڕۆژە کولتورییە هاوبەشەکان کە بەنیازن ئەنجامی بدەن لەکوردستان.
شایانی باسە بڕیارە کۆتایی مانگی نیسان کۆنسرتێکی موزیک و گۆرانی ، بەهاوبەشی لەنێوان هونەرمەندانی کوردستان و ئەڵمانیا بەرێوەبچێت وەک دەست پێکی یەکەم چالاکی کولتوری و رۆشنبیرى.