بۆ / سه‌رجه‌م  ده‌زگاكانی ڕاگه‌یاندن له‌ هه‌رێمی كوردستان
بابه‌ت / به‌ره‌نگاربونه‌وه‌ی ئه‌نفلوه‌نزای په‌تایی H1N1  له‌ هه‌رێمی كوردستان

دوا به‌دوای سه‌رهه‌ڵدانه‌وه‌ی ئه‌نفلوه‌نزای په‌تایی H1N1 له‌ چه‌ند ووڵاتێك به‌ تایبه‌تی له‌ ووڵاتانی ده‌وروبه‌ر  و چه‌ند پارێزگایه‌ك له‌ عێراق ، ڕاگه‌یاندنی وه‌زاره‌تی ته‌ ندروستی به‌ سووپاسه‌وه‌ داوا له‌ سه‌رجه‌م كه‌ناڵه‌كانی ڕاگه‌یاندن ده‌كات له‌ هه‌رێمی كوردستان كه‌ وه‌ك ئه‌ركێكی نیشتمانی و مرۆیی  هاوكاربن له‌ گه‌یاندنی په‌یامه‌كانی هۆشیاری  ته‌ندروستی به‌ هاووڵاتیان به‌مه‌به‌ستی پاراستنی ته‌ندروستی گشتی و سه‌لامه‌تی هاووڵاتیان .
پێناسه‌ی نه‌خۆشی یه‌كه‌
نه‌خۆشی یه‌كی درمی ڤایرۆسی یه‌ ، به‌هۆی ڤایرۆسی ئه‌نفلوه‌نزا A/H1N1   ڕووده‌دات ، ده‌بێته‌ هۆی هه‌وكردنی توندی كۆئه‌ندامی هه‌ناسه‌ی سه‌رو كه‌  له‌وانه‌یه‌ سووك ، مامناوه‌ند یان قورس و كوشنده‌ بێت به‌هۆی هه‌وكردنی سیه‌كان و په‌كخستنی كۆئه‌ندامی هه‌ناسه‌ .

نیشانه‌كانی نه‌خۆشی یه‌كه‌
تا ، كۆكه‌ ، ژانی گه‌روو، سه‌ر ئێشه‌، ژانی ماسولكه‌كان و بێ هێزی  وه‌ هه‌ندیك جار ده‌بێته‌ هۆی
سك چوون و رشانه‌وه‌ -
له‌باری قورس دا ده‌بێته‌ هۆی هه‌وكردنی سیه‌كان و په‌كخستنی كۆئه‌ندامی هه‌ناسه‌ و مردن -

ڕێگه‌كانی گوازتنه‌وه‌ی ڤایرۆسه‌كه‌
    به‌هۆی به‌ركه‌وتنی راسته‌وخۆ له‌گه‌ڵ ده‌ردراوه‌كانی (دڵۆپه‌كانی هه‌وا)  كۆئه‌ندامی هه‌ناسه‌ی نه‌خۆش (كه‌سی توشبوو به‌ ڤایرۆسه‌كه‌ )  له‌كاتی قسه‌كردن،كۆكه‌ و پشمین
     به‌ركه‌وتن ( ده‌ست لێ دان )  له‌گه‌ڵ ڕوو یان كه‌لوپه‌لی پیس بوو به‌ ڤایرۆسه‌كه‌ وه‌ك  ده‌سكی ده‌رگا،په‌نجه‌ره‌ و دیوار له‌ شوێنه‌ گشتی یه‌كان  ، دراو ، گالیسكه‌ له‌ سوپه‌ر ماركێت و مۆڵه‌كان .....  

ڤایرۆسه‌كه‌ له‌ سه‌ر ڕوو و كه‌ل و په‌له‌كان ( له‌ ژینگه‌ ) له‌ 2_ 8 كاتژمێر ده‌توانێت بمێنێته‌وه‌ و مرۆڤ توش بكات -.

هاووڵاتی به‌ڕێز ، بۆ خۆپاراستن له‌ توشبوون به‌ ئه‌نفلوه‌نزا
    زوو زوو  ده‌سته‌كانت به‌ئاو و سابون جوان بشۆ -
  -ده‌مامك (ماسك ) به‌كاربهێنه‌ له‌كاتی كۆكه‌ و پشمین
  له‌كاتی كۆكه‌و پشمین ده‌م و لووتت دابپۆشه‌ به‌ كلێنیكس یان ده‌سته‌ سڕ  پاشان فرێی بده‌ ناو سه‌به‌ته‌ی زبڵ ئنجا راسته‌وخۆ ده‌سته‌كانت بشۆ-.
    دووركه‌وه‌ له‌كه‌سی توشبوو به‌ نه‌خۆشی یه‌كه‌ ( دووری نێوانتان له‌ یه‌ك مه‌تر كه‌متر نه‌بێت )
    له‌كاتی گفتوگۆدا ، هه‌وڵبده‌ دووری نێوان خۆت و كه‌سی به‌رامبه‌ر له‌ یه‌ك مه‌تر كه‌متر نه‌بێت -.
   له‌كاتی سڵاودا كردن دا دووركه‌وه‌ له‌ ته‌وقه‌كردن و ماچ كردن و له‌ئامێزگرتن -.
    دوور كه‌وه‌ له‌شوێنی قه‌ڵه‌باڵغ -
 تا ده‌كرێت كه‌متر له‌ شوێنی قه‌ڵه‌باڵغ بمێنه‌وه‌
  له‌شوێنی كار زوو ده‌رگا و په‌نجه‌ره‌ بكه‌ره‌وه‌ بۆ هه‌وا گۆڕكێ

   كاتێك نیشانه‌كانی ئه‌نفلوه‌نزات لێ ده‌ركه‌وت (تا ، كۆكه‌ ، ژانی گه‌روو )  سه‌ردانی نزیكترین بنكه‌ی ته‌ندروستی بكه‌ -


                                                                         ڕاگه‌یاندنی وه‌زاره‌تی ته‌ندروستی
                                                 20/1 / 2013