نه‌شته‌رگه‌ری چاندنی گورچیله له‌هه‌رێم به‌گوێره‌ی ڕێنمایی یه پزیشكی و یاسایی یه‌كان ئه‌نجام ده‌درێت
ڕوونكردنه‌وه‌یه‌ك له وه‌زاره‌تی ته‌ندروستی
نه‌شته‌رگه‌ری چاندنی گورچیله له‌هه‌رێم به‌گوێره‌ی ڕێنمایی یه پزیشكی و یاسایی یه‌كان ئه‌نجام ده‌درێت
نه‌شته‌رگه‌ری چاندنی گورچیله ، یه‌كێكه له نه‌شته‌رگه‌ریه گرنگ و هه‌ستیاره‌كان كه ژیانی نه‌خۆش رزگارده‌كات له‌مردن و به‌و هۆیه‌وه ئه‌و نه‌خۆشانه‌ی په‌ككه‌وتنی گورچیله‌یان هه‌یه و گورچیله‌كانی له‌كاركه‌وتووه ده‌توانن درێژه به‌ژیان بده‌ن.
ئه‌نجامدانی ئه‌و نه‌شته‌رگه‌ریه له‌هه‌رێم پێشكه‌وتنی جۆریه له خزمه‌تگوزاریه ته‌ندروستیه‌كان و نیشانه‌ی به‌رزبونه‌وه‌ی ئاستی خزمه‌تگوزاریه ته‌ندروستی یه‌كانه له‌هه‌رێم.
ئێستا له‌هه‌رێمی كوردستان (3) سه‌نته‌ری پێشكه‌وتووی چاندنی گورچیله هه‌یه له‌شاره‌كانی هه‌ولێر و سلێمانی و دهۆك ، وه له‌ساڵی 2007 ه‌وه خزمه‌تی نه‌خۆشانی په‌ككه‌وتووی گورچیله ده‌كه‌ن له هه‌رێم تاوه‌كو ئیستا زیاتر له (2000) نه‌شته‌رگه‌ری سه‌ركه‌وتووی چاندنی گورچیله‌یان ئه‌نجامداووه و به‌هۆیه‌وه زیاتر له (2000) نه‌خۆش ژیانیان رزگاركراوه له‌مردن ، له‌و ژماره‌یه‌ش زیاتر له نیوه‌ی نه‌خۆشه‌كان هاووڵاتیانی عه‌ره‌ب بوون كه له‌پاریزگاكانی تری عێراق هاتوونه شاره‌كانی هه‌رێم بۆ ئه‌نجامدانی ئه‌و نه‌شته‌رگه‌رییه .
نه‌شته‌رگه‌ری چاندنی گورچیله به‌گوێره‌ی ڕێنمایی یه پزیشكی و یاسایی یه‌كان ئه‌نجامده‌درێت پشت به‌یاسای ژماره (85) له‌ساڵی 1986 هه‌روها یاسایه‌كی تازه‌ی تر كه ئاماده‌كراووه و له‌هه‌مان یاسا وه‌رگیراووه ، لێژنه‌یه‌كی پسپۆڕی تایبه‌ت هه‌یه بۆ بڕیاردان له‌سه‌ر ئه‌و نه‌شته‌رگه‌ریه كه پێكهاتووه له پزیشكانی پسپۆڕی هه‌ناو ، گورچیله،نه‌شته‌رگه‌ری گورچیله،ده‌روونی و ئه‌ندامێكی یاسایی هه‌روها كه‌سی خۆبه‌ش كه گورچیله‌كه ده‌به‌خشێت له‌لایه‌ن لایه‌نی ئاسایشه‌وه ده‌بیندرێت و به‌ڵێننامه‌ی یاسایی واژوو ده‌كات كه ده‌ری ده‌خات كه‌سه‌كه به‌ئاره‌زووی خۆی وه به‌بێ فشارخستنه سه‌ر و به‌بێ به‌رامبه‌ر (به‌خۆرایی) گورچیله‌كه‌ی ده‌به‌خشێت به نه‌خۆشه‌كه .
هاوكات له‌ڕێگه‌ی ئه‌و روونكرنه‌یه‌وه داوا له‌هاووڵاتیان ده‌كه‌ین هه‌ر كه‌سێك زانیاری لایه كه ئه‌و نه‌شته‌رگه‌ری یه به‌ده‌ر له‌و ڕێنماییانه ئه‌نجامدراووه له هه‌رێم با په‌یوه‌ندیمان پێوه‌بكات و سكاڵا تۆماربكات ، وه‌ك وه‌زاره‌تی ته‌ندروستی به‌هیج جۆرێك قبۆلناكه‌ین دوور له ڕێنماییه پزیشكی و یاساییه‌كان ئه‌و نه‌شته‌رگه‌ریه ئه‌نجام بدرێت و سزای قورسی سه‌رپێچی كارانیش ده‌ده‌ین ئه‌گه‌ر هه‌بێت .