ڕۆژی یەکشەممە 1-9-2019 له‌دیوانی وه‌زاره‌ت د. دارا ڕه‌شید وه‌زیری پلاندانانی حكومه‌تی هه‌رێم پێشوازی كرد له‌ جۆن ویلكس باڵوێزی به‌ریتانیا له‌عێراق و شاندێكی یاوه‌ری .
‎له‌دیدارێكدا باس له‌ په‌یوه‌ندیه‌كانی نێوان هه‌ردوولا كرا به‌تایبه‌ت له‌ڕووی ئابوری و بازرگانی و سه‌ربازی، باڵیۆزی به‌ریتانیا له‌عێراق ڕای گه‌یاند رۆڵی هه‌رێمی كوردسان بۆ وڵاته‌‌كه‌ی گرنگه‌ له‌ناوچه‌كه‌ و عێراق.
‎له‌به‌شێكی تری دیداره‌كه‌ گفتۆ له‌باره‌ی په‌یوه‌ندییه‌‌كانی نێوان هه‌رێم و به‌غدادكرا، باڵوێزی به‌ریتانیا له‌عێراق ڕای گه‌یاند به‌ریتانیا پاڵپشتی و پێشوازی له‌هه‌موو ده‌ستپێشخه‌ری و رێكه‌وتنێك ده‌كات به‌ئامانجی چاره‌سه‌ری كێشه‌كان و گه‌یشتنه‌یه‌كی نێوان هه‌ردوولا به‌شێوه‌یه‌ك به‌ریتانیا هه‌موو هه‌ولێكی خۆی ده‌خاته‌كار.
‎دواتر تاوتوێی ئه‌نجامدانی پرۆسه‌ی سه‌رژمێری گشتی له‌عێراق كرا" وه‌زیری پلاندانان ئاماژه‌ی به‌ به‌رێوه‌چوونی ئه‌و پرۆسه‌یه‌ كرد كه‌ پێویسته‌ ره‌وشی ناوچه‌كه‌ ئاسایی بكرێته‌وه‌ به‌تایبه‌ت ناوچه‌ دانڕێندراوه‌كان‌ و ئاسایی كردنه‌وه‌ی ئه‌و گۆڕانكارییانه‌ی كه‌ ساڵانێكه‌ هه‌وڵی بۆدراوه‌ و ماده‌ی 140 یش جێبه‌جێ بكرێت كه‌ دانیشتوانی ڕه‌سه‌نی ناوچه‌كان بگه‌ڕێنه‌وه‌‌ شوێنه‌كانی خۆیان.
‎له‌به‌رامبه‌ردا باڵوێزی به‌ریتانیا له‌عێراق جه‌ختی له‌سه‌ر ئه‌وه‌ كرده‌وه‌ كه‌ حكومه‌تی به‌ریتانیا هه‌موو تواناكانی به‌كارده‌هێنێت به‌مه‌به‌سه‌تی جێبه‌جێ كردنی سه‌رژمێریه‌كی دروست به‌شێوه‌یه‌ك هه‌رێم و به‌غداد هاورابن له‌سه‌ری .
‎پاشان جه‌خت له‌سه‌ر به‌رده‌وامی هاوكاریه‌كانی به‌ریتانیا بۆ هه‌رێم كراوه‌ له‌ڕێگه‌ی پته‌وكردنی په‌یوه‌ندیه‌ سیاسیی و كۆمه‌ڵایه‌تی و ئابوریه‌كانی هه‌ردوولا كه‌ له‌ئێستادا ژماره‌یه‌كی زۆری كۆمپانیای ئه‌و ووڵاته‌ له‌هه‌رێم كاری وه‌به‌رهێنان ئه‌نجامده‌ده‌ن، باڵوێزی به‌ریتانیا ڕاشی گه‌یاند وڵاته‌‌كه‌ی بڕی 1 ملیار پاوه‌ندی ئیسته‌رلینی ئاماده‌كرده‌وه‌ بۆ جێبه‌جێ كردنی ژماره‌یه‌ك پرۆژه‌ له‌عێراق و هه‌رێمی كوردستان له‌و پێناوه‌ش هه‌وڵه‌كانی زیاتر ده‌بن بۆ هێنانی كۆمپانیاكانی وڵاته‌‌كه‌ و هاوكاری كردنی هه‌رێم له‌بواره‌كانی كشتوكاڵ و گه‌شت و گوزار و ته‌ندروستی و په‌روه‌رده‌ و بنیاتنان و بوژاندنه‌وه‌ی بانكه‌كان له‌هه‌رێم.
‎له‌كۆتایش وه‌زیری پلاندانان ئاماژه‌ی به‌ كار و به‌رنامه‌كانی حكومه‌تی هه‌رێم كرد به‌تایبه‌ت له‌ چاكسازی و نه‌هێشتنی گه‌نده‌ڵی و دامه‌زراندنی حكومه‌تێكی ئه‌لیكترۆنی بۆ ڕایی كردنی مامه‌ڵه‌ی هاووڵاتیان.
‎له‌به‌رامبه‌ردا باڵوێزی به‌ریتانیا رۆڵی هه‌رێمی كوردستانی له‌ناوچه‌كه‌ به‌گرنگ‌ وه‌سفكرد و ئاماده‌ی هه‌موو هاكاریه‌كی وڵاته‌‌كه‌ی نیشاندا بۆ سه‌رخستنی كارنامه‌ی حكومه‌ت و چاره‌سه‌ری كێشه‌كانی نێوان هه‌رێم و به‌غداد.