رۆژی ٢/٦/٢٠١١ رێکخراوی (هابیتات)ی سەربە نەتەوە یەکگرتووەکان بەفەرمی ستراتیژی نیشتەجێکردنی هەولێری پێشکەشکرد بە وەزیری پلاندانان کە نوێنەرایەتی حکومەتی هەرێمی کوردستانی دەکرد.

لە کۆبوونەوەیەکی باڵادا، کە ژمارەیەک وەزیری حکومەتی هەرێم، پارێزگاری هەولێر، سەرۆکی دەستەی وەبەرهێنان و سەرۆکی رێکخراوی هابیات (جۆن کلۆس) و جێگری نوێنەری سکرتێری گشتی نەتەوە یەکگرتووەکان (کرستین مەکناب) ئامادەی بوون، بەڕێز جۆن کلۆس سەرۆکی رێکخراوی هابیتات بەفەرمی ستراتیژی نیشتەجیکردنی هەولێری پێشکەشکرد بە بەڕێز دکتۆر عەلی سندی وەزیری پلاندانان. ستراتیژی نیشتەجێکردنی هەولێر، یەکەم ئەزموونی لەم جۆرەیە کە حکومەتی هەرێمی کوردستان بەهاوکاری رێکخراوی هابیتات دایدەڕێژێت.

لە وتەیەکدا، بەڕێز دکتۆر عەلی سندی باسی لە گرنگی ئەم ستراتیژە کرد بۆ پارێزگای هەولێر و بۆ چارەسەکردنی کێشەی نیشتەجێبوون، هەروەها جەختی لەوە کردەوە کە ئەم ستراتیژە گروپە داهات نزمەکان لەبەرچاودەگرێت و رێگەچارەی گونجاوی دیاریکردوە بۆ چارەسەرکردنی کێشەی نیشتەجێبوونی هەژاران و خاوەن پێداویستییە تایبەتەکان. لەکۆتایی وتەکەیدا بەڕێز دکتۆر عەلی سندی سوپاسی رێکخراوی هابیتاتی کرد بۆ هاوکاریکردنی حکومەت لەم هەنگاوە گرنگەدا، هەروەها داوای لێکردن کە بەردەوامبن لەم هاوکارییە بۆ داڕشتنی ستراتیژێکی نیشتەجێکردن بۆ هەموو هەرێمی کوردستان. 

جێگەی ئاماژەیە کە وەزارەتی پلاندانان گرنگیەکی تایبەت دەدات بە کەرتی نیشتەجێکردن و بەهاوکاری وەزارەتی ئاوەدانکردنەوە و نیشتەجێکردن و وەزارەتی شارەوانی و گەشتوگوزار و دەستەی ئامار لە هەوڵی بەردەوامدان بۆ بوژاندنەوەی ئەم کەرتە و ئاوڕادانەوەی شیاو لەو گروپانەی کە ئێستا شوێنی نیشتەجێبوونی گونجاویان نییە. بڕیارە بەم نزیکانە وەزارەتی پلاندانان و لایەنە پەیوەندیدارەکانی تری حکومەتی هەرێم بەهاوکاری رێکخراوی هابیتات ستراتیژی نیشتەجێکردن بۆ هەرێمی کورسستان دابڕێژن.