بە ئامادەبوونی به‌رێز مەسعود بارزانی سەرۆکی هەرێمی کوردستان و نێچیرڤان بارزانی، سەرۆک وەزیرانی هەرێمی کوردستان و گرووپی بانکی نێودەوڵەتی، کۆنفرانسی ریفۆرم لە ئابووری هەرێمی کوردستاندا لە پێناو بووژانەوەی گشتی و پاراستنی چینی هەژاران، لە هۆڵی سەعد عەبدوڵڵا به‌رێوه‌چوو.

لە دەستپێكی كۆنفرانسەكەدا وەزیری پلاندانان، دكتۆر عەلی سندی تیشكی خستە سەر هۆكارەكانی سەرهەڵدانی قەیرانی دارایی و گوتی: "بڕینی بەشە بوودجەی هەرێمی كوردستان لەلایەن حكوومەتی عێراق، شەڕی داعش، هاتنی ئاوارەكان و دابەزینی نرخی نەوت چەند هۆكارێكی سەرەكی بوون بۆ سەرهەڵدانی قەیرانی دارایی لە هەرێمی كوردستان، ماوەی دووساڵە بەمەبەستی كەمكردنەوەی كاریگەریەكان حكوومەتی هەرێمی كوردستان هەوڵ و كۆششی خۆی خستووەتەگەڕ بۆ دۆزینەوەی رێگەچارە بۆ دەربازبوون لەم قەیرانە".

وەزیری پلاندانان لە سێ خاڵدا باسی نەخشە رێگاكەی كرد كە بریتی بوون لە مێژوو و ناوەڕۆك و داهاتووی پلانەكە و رایگەیاند "ئەم نەخشە رێگایە بەرهەمی چەند ساڵەی كاركردنە لەگەڵ بانكی نێودەوڵەتی و ئاژانسەكانی نەتەوە یەكگرتووەكان و دەزگا نێودەوڵەتییەكانی دیكە، لە هەمانكاتدا پشتی بەستووە بە 45 راپۆرت و توێژینەوەی زانستی".

وەزیری پلاندان ئاماژەی بە قۆناغەكانی ئەو پڕۆژەیە كرد و گوتی: "ئەم قۆناغە نوێیە جێبەجێكردنی چوار پڕۆژە بوو كە یەكەمیان چوارچێوەی ستراتیجی پاراستنی كۆمەڵایەتی بۆ تاوتوێكردنی بابەتی خانەنشینی و بیمەی كۆمەڵایەتی، دووەم نوێكردنەوەی رێنماییەكانی جێبەجێكردنی گرێبەستە گشتییەكان، سێیەم دیاریكردنی گەشەی ئابووری و چوارەم ئەنجوومەنی شوورا بوو".

وەزیری پلاندانی حكوومەتی هەرێمی كوردستان، ئاماژەی بە راپۆرتەكە كرد و گوتی: "راپۆرتەكە لە 7 بەشی سەرەكی پێكدێت كە 200 لاپەڕەیە و 24 كرداری جۆراوجۆر لەخۆ دەگرێت، كە دیارترینییان بریتین لە ریفۆرمی راژە و مووچە، زیادكردنی داهات، كەرتەكانی دارایی، كشتوكاڵ، بەڕێوەبردن و ئاسایشی ئاو، خزمەتگوزاری و گەشتیاری و وزە و گواستنەوە و گەیاندن".