ئەمڕۆ ٢/٨/٢٠١١ بەڕێز دکتۆر عەلی سندی، وەزیری پلاندانانی حکومەتی هەرێمی کوردستان، پێشوازیکرد لە شاندێکی نەتەوە یەکگرتووەکان کە پێکهاتبوو لە سەرۆکی رێکخراوی کاری نێودەوڵەتی (ILO) لە عێراق و نوێنەری پرۆگرامی پەرەپێدانی نەتەوە یەکگرتووەکان (UNDP) و بەرپرسی پرۆگرامی پەرەپێدانی ناوچەکان.

شاندەکە باسیان لە دەستپێکردنی قۆناغی دووەمی پرۆگرامی پەرەپێدانی ناوچەکان کرد کە زۆربەی پارێزگاکانی عێراق و هەرێمی کوردستان دەگرێتەوە و بودجەی زیاتری بۆ تەرخان دەکرێت لەلایەن نەتەوە یەکگرتووەکان و حکومەتی عێراقییەوە. ئامانجی ئەم پرۆگرامە زیادکردنی ئاستی بەشداریکردنی هاووڵاتییانە لە پرۆسەی بڕیاردان لەسەر جۆر و چۆنێتی ئەو پرۆژانەی لە ناوچەکانیان جێبەجێ دەکرێت. بەشێکی گرنگی پرۆژەکە راهێنان و بونیاتنانی توانای کارمەندانی حکومەت و فەرمانگەکانی ناوچەکانە لەسەر چۆنێتی بەشداریپێکردنی هاووڵاتیان لە پرۆسەی بڕیاردندا.

وەزیری پلاندانان ئاماژەیدا بە گرنگی ئەم پرۆگرامە، چونکە یەکێک لە سیاسەتەکانی حکومەتی هەرێمی کوردستان برەودانە بە سیستەمی لامەرکەزیەت لە بڕیارداندا، ئەم پرۆژەیەش دەچێتە چوارچێوەی ئەو بوارەوە. هەروەها وەزیری پلاندنان باسی لە گرنگی هاوکاری نێوان حکومەتی هەرێم و ئاژانسەکانی نەتەوە یەکگرتووەکان کرد و ئاماژەیدا بە شێوازی نوێی کارکردنی هاوبەش کە حکومەتی هەرێم راستەوخۆ بەشداری دەکات لە تەمولیکردنی هەندێک لە پرۆژە هاوبەشەکان لەگەڵ نەتەوە یەکگرتووەکان.

جێگەی ئاماژەیە کە پرۆگرامی پەرەپێدانی ناوچەکان پرۆگرامێکی چوار ساڵییە کە زیاتر لە ئاژانسێکی نەتەوە یەکگرتووەکان بەشداری تێدا دەکەن. ئەم پرۆگرامە بایەخی تایبەت دەدات بە توانادارکردنی هاووڵاتیان بۆ بەشداریکردن لە پرۆسەی بڕیاردان لەسەر ئەو پرۆژانەی لە ناوچەکانیان جێبەجێ دەکرێن.