‎د.دارا ڕه‌‌شید وه‌زیری پلاندانان ڕای ده‌گه‌یه‌نێت سوود له‌ ئه‌زموون و شاره‌زایی كه‌سانی پسپۆر وه‌رده‌گرین و هانی ده‌زگا و دامه‌زراوه‌كانی تایبه‌ت به‌توێژینه‌وه‌ی زانستی‌ ده‌ده‌ین بۆ به‌رده‌وام بون له‌سه‌ر پاڵپشتی كردنی پلانی نیشتمانی بۆ كوردستان.
‎ئه‌م وتانه‌‌ی وه‌زیری پلاندانان له‌میانی پێشوازی كردن له‌ د.دلاوه‌ر عه‌لائه‌دین سه‌رۆكی ئینستیوتی رۆژهه‌ڵاتی ناوه‌ڕاست بۆ توێژینه‌وه‌ (مێری) و فاروق جه‌میل وه‌زیری پێشووتری دادی حكومه‌تی هه‌رێم هات، كه‌ ڕۆژی یه‌كشه‌ممه‌‌ 4-8-2019 سه‌ردانی دیوانی وه‌زاره‌تی پلاندانانیان كرد.
‎له‌دیدارێكدا وه‌زیری پلاندانان باسی له‌ هه‌وڵه‌‌كانی وه‌زاره‌ت كرد بۆ پێشخستنی سێكته‌ره‌ جیاجیاكان له‌ڕێگه‌ی دانان و داڕشتنی پرۆژه‌و پلانی درێژخایه‌ن بۆ حكومه‌ت و هه‌نگاونان بۆ سوود وه‌رگرتن له‌ كه‌سانی پسپۆر و شاره‌زا به‌شێوه‌یه‌ك دامه‌زراوه‌كانی تایبه‌ت به‌ توێژینه‌وه‌ی زانستی هه‌وڵی جدی خۆیان بده‌ن بۆ توێژینه‌‌وه‌ و ئاماده‌كردنی پلانی ستراتیژی له‌بواره‌ جیاجیاكان.
‎له‌لایه‌ن خۆیه‌وه‌ سه‌رۆكی ئه‌نیستیوتی مێری بۆ توێژینه‌‌وه‌ هه‌موو پاڵپشتی و هاوكاری ئه‌نیستیوت بۆ وه‌زیری پلاندانان و وه‌زاره‌ت دووپاتكرده‌وه‌ به‌ئامانجی زیاتر خزمه‌تكردن و ده‌ستنیشانكردنی پلان و به‌رنامه‌ی حكومه‌تی هه‌رێمی كوردستان له‌سێكته‌‌ره‌ جیاجیاكان.
‎فاروق جه‌میل وه‌زیری پێشوی دادی حكومه‌تی هه‌رێمی كوردستان له‌ ووته‌كدا رۆڵ و ئه‌ركی وه‌زاره‌تی پلاندانانی به‌گرنگ وه‌سف كرد بۆ درێژه‌دان به‌ كار و پرۆژه‌كانی حكومه‌ت و گه‌یاندنی سوود و شاره‌زایی به‌ دامه‌زراوه‌كانی حكومه‌ت.
‎هاوكات وه‌زیری پلاندانان ڕایگه‌یاند لێكۆڵه‌ڕان و توێژه‌ران هانده‌ده‌ن له‌بواری توێژینه‌وه‌ی زانستی و دۆزینه‌وه‌ی ڕێگاچاره‌ی زانستی گونجاو هاوكاری حكومه‌تی هه‌رێم بن له‌ چاره‌سه‌ركردن و بنبڕكردنی كێشه‌كان.