رۆژی پێنج شه‌ممه‌ 8-8-2019 له‌دیوانى وه‌زاره‌ت د. دارا ڕه‌شید وه‌زیرى پلاندانانى حكومه‌تى هه‌رێم پێشوازى كرد له‌ كۆمه‌ڵه‌ى بانكه‌ تایبه‌ته‌كانى عێراق. ‎

له‌دیدارێك وه‌فدى میوان كورته‌یه‌كیان له‌باره‌ى كارو پرۆژه‌كانیان له‌عێراق خسته‌روو . ‎له‌لایه‌ن خۆیه‌وه‌ وه‌زیرى پلاندانان ڕاى گه‌یاند لە هه‌رێمى كوردستان به‌هه‌وڵى هه‌موولایه‌ك قه‌یرانێكى سه‌ختى داراییمان تێپه‌راند كه‌ ماوه‌ى چه‌ند ساڵێك به‌رۆكى هه‌رێمى كوردستانى گرتبوو له‌و پێناوه‌شدا و بۆ باشتر بەڕێوەچوونی كارەكان و ڕێگرتن لە دووبارەبوونەوەی ئەم جۆرە قەیرانە رێكخستنه‌وه‌ى كارى بانكه‌كان بەگرنگ دەزانین و كاری بۆ دەكەین، ‌ به‌تایبه‌ت بۆ بووژاندنە‌وه‌ى سێكته‌ره‌ جیاجیاكان و هه‌وڵدان بۆ پێشخستنى كارى وه‌به‌رهێنان له‌ناوخۆى هه‌رێمى كوردستان به‌له‌به‌رچاو گرتنى رۆڵى به‌رچاویان له‌ ڕاكێشانى سه‌رمایه‌دار و بازرگانان و كۆمپانیا بیانیه‌كان بۆ هه‌رێمى كوردستان. ‎هاوكات داواشى لێكردن كاره‌كانیان فراوانتر بكه‌ن به‌شێوه‌یه‌ك بانكه‌كان ببنه‌ جێگاى متمانه‌ى بازرگان و سه‌رمایه‌داره‌كان هاوشان له‌گه‌ڵ حكومه‌تى هه‌رێم كێبركێ بكه‌ن بۆ خزمه‌تكردنى ووڵات.

‎له‌به‌شێكى ترى دیداره‌كه‌ د. دارا ڕه‌شید وه‌زیرى پلاندانان به‌ووردى تیشكى خسته‌ر پلان و به‌رنامه‌ى وه‌زاره‌ت كه‌ هه‌نگاوه‌كانى به‌ئاراسته‌ى رێكخستنه‌وه‌ى ئالیه‌تى كارى كه‌رتى تایبه‌ت و گشتیه‌ له‌ دامه‌زراوه‌كانى هه‌رێمى كوردستان، بۆئه‌مه‌ش به‌گرنگى زانى بانكه‌ تایبه‌ته‌كان هاوشانى بانكه‌ حكومییە‌كان سوود له‌ ئه‌زموون و شاره‌زایى یه‌كتر وه‌ربگرن له‌پێناو نه‌هێشتنى رۆتین و كارى درێژخایه‌نى مامه‌ڵه‌ى هاوڵاتیان و كۆمپانیاكان له‌رێگه‌ى به‌ئه‌لیكترۆنى كردنى سیسته‌مى كارى بانكى له‌هه‌رێمى كوردستان و به‌ستنه‌وه‌یان به‌یه‌كترى.