کۆنفرانسی پەرەپێدانی پەیوەندیە ئابوریەکانی نێوان هەرێمی کوردستان و کۆماری ئیسلامی ئێران لە شاری هەولێر بۆ ماوەی ٢رۆژ  لەبەرواری ٣/٥/٢٠١٨ بەردەوام بوو. لە میانەى بەرێوەچوونى كۆنفرانسەکە د. عەلى سندى وەزیرى پلاندانان و وەزیری بازرگانى و پیشەسازى حكومەتى هەرێمى كوردستان بە وەكالەت، لە ووتارێكدا، سەرەتا بەخێرهاتنى هەریەك لە بەرێزان نێچرڤان بارزانى، سەرۆكى حكومەتى هەرێمى كوردستان، د. محمد شەریعەتمەدارى، وەزیرى بازرگانى و پیشەسازى كۆمارى ئیسلامى ئێران و بەرپرسانی دیکەی حكومەتى ئێران و عێراقی كرد. دواتر ئاماژەى بەوەدا كە كۆنفراسى پەرەپیدانى ئابوورى نێوان هەرێمى كوردستان و كۆمارى ئیسلامى ئێران گرنگییەكى زۆرى هەیە چونكە لاى هەمووان ئاشكرایە كە پەیوەندیەكانى نێوان هەردوولا پەیوەندیەكى لەمێژینەیە لە هەموو ئاست و بوارێكدا، کە بواری بازرگانى و پیشەسازى یەکێکە لەو بوارانە. هەر لەمیانەی وتارەکەیدا د. عەلی سندی ئاماژەی دا کە لە ساڵى ١٩٩١تا ئەمرۆ ئەم پەیوەندیە رۆژ لەدوایى رۆژ پەرەى سەندووە تا گەیشتۆتە ئاستێكى بەرز. لەبەردەوامی ووتەکەیدا گوتی کەوا قەبارەى ئاڵوگۆرى بازرگانى نێوان هەرێمى كوردستان و ئێران گەیشتۆتە هەشت ملیار دۆلارو ، تەنها لە ساڵى ٢٠١٧پێنج ملیار دۆلار هەناردەی کۆماری ئیسلامى ئێران بووە. ئێستا لە هەرێمى كوردستان ٣٦٠ كۆمپانیاو ١٣٥ كارگەى ئێرانى لە بوارەكانى بازرگانى و پیشەسازى چاڵاكى جۆراو جۆر ئەنجام دەدەن، وە سەرمایەى خۆیان بەگەڕ دەخەن، وە بازارى هەرێم بەكاڵاو بەرهەم و خزمەت گوزاریە جیاجیاكان دەوڵەمەند دەكەن ئەمەش بێگومان كاریگەرى ئەرێنى لەسەر هەردوولا دروست دەكات، بۆیە جاوەڕوان دەکرێت لە ئایندەیەكى نزیكدا ئەم ژمارانە زیاتر بەرز ببنەوە پەیوەندیەكان زیاتر بەرەو پێشەوە بچن. بۆ ئەم مەبەستەش بەڕێزیان چەند خالێكی گرنگیان خستەڕوو بۆ بەرەوپێشبردنى زیاترى پەیوەندیە ئابوورى و بازرگانیەكانى نێوان هەردوولا کە بریتی بوون لە:

یەكەم: ئاسانكارى لەهاوردەو هەناردەكردنى كاڵاو كەلوپەل لەلایەن هەردوو لادا بكرێت بەتایبەت ئەو كاڵایانەى كوالێتیان بەرزە.
دووەم: بەفەرمى كردنى ئەو خاڵە سنوریانەى كە ئێستا بازرگانى لە رێگایانەوە دەكرێت بۆ ئەوەى بەشێوازێكى فەرمی لەژێر كۆنترۆڵ و چاودێرى هەردوولا دابێت.
سێیەم: دەكرێت هەرێمى كوردستان وەك بازارێكى ستراتیژى درێژخایەن تەماشابكرێت نەوەك بازارێكى كورتخایەن، بۆیە گرنگە كە سەرمایەدارانى ئێران وەبەرهێنان لەبوارەكانى بازرگانى و پیشەسازى زیاتر بكەن و كارگەكانیان لە هەرێمى كوردستان دابمەزرێنن بەمەش تێچووى بەرهەمەكانیان كەمتر دەبێت و دەتوانن كێبركێى بەرهەمى وڵاتـانى ترى پێ‌ بكەن.
چوارەم :ئەم خاڵە کەخاڵێكى هاوبەشە لەنێوان هەردوولا واتا هەرێمى كوردستان و كۆمارى ئیسلامى ئێران ئەویش بەناوى وەزارەتى بازرگانی و پیشەسازى حكومەتى هەرێمى كوردستانەوەو گوتی داوا لە حكومەتى عێراقی فیدرال دەكەین بازگەى ئەلعوزەیم نەمێنێت كە ئەمەش ئاسانكاریە بۆ پەرەپێدانى بازرگانى لەنێوان هەردوولادا.
پێویستە بگوترێت کە لە کۆتایی ئەم سەردانەی شاندەکەی کۆماری ئیسلامی ئێران رێککەوتنێک لەنێوان وەزیری بازرگانی حکومەتی هەرێمی کوردستان بە وەکالەت و بەڕێوەبەری گشتی رێکخراوی گەشەپێدانی بازرگانی و جێگری وەزیری پیشەسازی و بازرگانی ئێران واژۆکرا، کە بێگومان ئەو رێککەوتنە دەبێتە هەنگاوێکی تری پەرەپێدانی پەیوەندیە ئابوریەکانی هەردوولا. شایانی باسە ئەم کۆنفرانسە کە لەلایەن یەکێتی ژوورەکانی بازرگانی و پیشەسازی و، بە هاوکاری لەگەل سکرتاریەتی ئەنجومەنی ئابوری هەرێمی کوردستان ڕێکخرا بوو.