وەزارەتی کارەبا

وەزیری کارەبا چەند پرۆژەیەکى گرنگى کارەبا لە سنوورى پارێزگاى دهۆک دەکاتەوە و هەردوو وێستگەی کارەبای شاخکی وئایتۆت و بینایەی نوێی دابەشکردنی کارەبای دهۆک کرایەوە

بەمەبەستى کردنەوەى چەند پرۆژەیەکى گرنگى بوارى کارەبا و هەڵسەنگاندنى کارەکانی فەرمانگەکانى سەر بە وەزارەتى کارەبا لە پارێزگای دهۆک، ڕێکەوتى 26/11/2014 دکتۆر سەڵاحەدین بابەکر وەزیرى کارەبا بە یاوەرى شاندێکی وەزارەت سەردانى پارێزگای دهۆکی کردوو لەلایەن بەڕێز فەرهاد ئەتروشی پارێزگاری دهۆکەوە پێشوازییان لێکرا. لە دیدارەکەدا پارێزگاری دهۆک وێڕای بەخێرهاتنی وەزیر دەستخۆشی لەچۆنیەتی بەڕێوەچوونی پرۆژەکانی وەزارەتی کارەبا کرد لە سنووری پارێزگای دهۆک و داوای لەبەڕێزیان کرد هەوڵەکانیان زیاتر بەگەڕِبخەن لەپێناو زیاتر گرنگیدان بە پارێزگای دهۆک کە بەبارودۆخێکی خراپدا تێپەڕ دەبێت و ژمارەیەکی یەکجار زۆر ئاوارە روویان لەو پارێزگایە کردووە ، لەلایەن خۆیەوە وەزیری کارەبا سوپاسی پێشوازی گەرمی پارێزگاری دهۆک کردوو هەروەها دەستخۆشی لە تەواویی کارمەندو ئەندازیارانی بەڕێوەبەرایەتی گشتی کارەبای دهۆک کرد کە بوونەتە تیمێک بۆ جێبەجێکردنی پلانی پێشوازیکردنی ئاوارەو ئەنجامدانی دەیان پرۆژەی گرنگی بواری راکێشان و دابەشکردنی کارەبا بەتایبەتی بۆ ئەو ژمارە زۆرەی کەمپ کە توانراوە 378 محاویلە بۆ 24 کەمپ دانرێت ، هاوکات جەنابی وەزیر ئاماژەی بەبەرنامەو کاری وەزارەت کرد بەتایبەتی لەپارێزگای دهۆکدا و بەڵێنی پێشکەشکردنی پرۆژەی زیاتری لەو پارێزگایە دا ، لەو دیدارەدا گفتوگۆ لەسەر چۆنیەتی چارەسەرکردنی گرفتی محاویلەی وێستگەی گۆڕینی زاخۆ کرا ، کە ماوەیەکە سوتاوە بەهۆی بارزۆری و هەڵکشانی خواستی بەکارهێنانی کارەبا.. دواتر وەزیری کارەبا لەمەراسیمێکدا بەیاوەری پارێزگاری دهۆک هەردوو پرۆژەى وێستگەى شاخکی و ئەیتوتی لە سەنتەری شاری دهۆک کردەوە. جێی باسە ئەم دوو وێستگەیە بە بودجەی حکوومەتى هەرێم لە لایەن کۆمپانیاى کارەوە ئەنجام دراون و رۆڵی گرنگی لەباشبوونی ژێرخانی کارەباو کەمکردنەوەی بارزۆری سەر تۆڕەکانی کارەبا لەناوچەیەکی فراوانی ناو شاری دهۆک و قەزای ئامێدی و ناحیەکانی سەرسەنگ و زاوێتەو دێرەلۆک و شیڵادزێ دەبێت . هەر لەچوارچێوەى سەردانەکەیدا بۆ پارێزگای دهۆک وەزیری کارەبا بینایەی نوێی بەڕێوەبەرایەتی گواستنەوەی کارەبای دهۆکی کردەوە لەکۆنگرەیەکی رۆژنامەوانیشدا دکتۆر سەڵاحەدین بابەکر وەزیری کارەبا ئاماژەی بەگرنگی ئەو پرۆژانە کردوو بەوەڵامێکیشی دانا بۆ ئەو ناحەزانە کە دەیانویست بە شەڕ رێڕەوی پێشکەوتنەکانی کوردستان بووەستێنن، لەتەوەرێکی تری کۆنگرە رۆژنامەوانیەکەیدا وەزیری کارەبا باسی ئەو پلانە کرد کە وەزارەت لەماوەی 4 ساڵی رابردوودا لەسەرانسەری هەرێمی کوردستان جێبەجێی دەکات و سەرجەم سێکتەرەکانی بواری کارەبا لەخۆدەگرێت .

هەر هەمان رۆژ وەزیری کارەبا سەردانی کەمپی دۆمێزی هاونیشتمانیانی کوردانی رۆژئاوا کردوو لەلایەن ئیدریس نەبی بەرپرسی کەمپەکانی پارێزگای دهۆکەوە پێشوازی لێکراو وەزیری کارەبا لەنزیکەوە گوێبستی گرفت و کێشەکانی هاونیشتمانیان بوو داوای لەهاووڵاتیانی کوردستانیش کرد یارمەتی ئاوارەکان بدەن بەکوژانەوەی گڵۆپێک کە دەبێتە هۆی رووناککردنەوەی خەیمەیەکی ئاوارە .
دواتر دکتۆر سەڵاحەدین بابەکر وەزیری کارەبا سەردانی بەڕێوەبەرایەتی گشتی کارەبای دهۆک کردوو ، لەگەڵ گەیشتنیشی لە هۆڵى کۆبوونەوەکان لەگەڵ بەرێوەبەران و ئەندازیارانى فەرمانگەکانى کارەبا لەو پارێزگایە کۆبووەو تەئکیدی لەسەر زیاتر خزمەتکردنی هاوڵاتییان و پێشخستنی سیستەمی دابەشکردنی کارەباو کۆکردنەوەی نرخی کارەبا کردەوەو گوێبستی داواکاریی و پێشنیارەکانیان بوو.

sawen