بێگەرد تاڵەبانی، وەزیری كشتوكاڵ و سەرچاوەكانی ئاو دەڵێت، پاڵپشتی كەرتی تایبەت دەكەین بۆ بونیادنانی پرۆژەی كشتوكاڵی و هاوكاریكردنی جوتیاران. ئەمرۆ پێنج شەممە 10/10/2019، بێگەرد تاڵەبانی، وەزیری كشتوكاڵ و سەرچاوەكانی ئاو، پرۆژەی شیری نایابی لەناحیەی قوشتەپە بەسەركردەوە. وەزیری كشتوكاڵ و سەرچاوەكانی ئاو، لەكاتی بەسەركردنەوەی پرۆژەكە وتی : پاڵپشتی كەرتی تایبەت دەكەین بۆ بونیادنانی پرۆژەی كشتوكاڵی لە پێناو پاراستنی بەرهەمی ناوخۆی. وەزیری كشتوكاڵ و سەرچاوەكانی ئاو باسی لەوەشكرد، لەو كاتانەی بەرهەمی ناوخۆی پێدەگات زیاترە لەخواستی ناوخۆیی، بۆیە داوا لەكەرتی تایبەت دەكەین هاوكارمانبن لە بونیادنانی پرۆژەی كشتوكاڵی و هەناردەكردنی بەرهەمی ناوخۆی بۆ وڵاتان. بێگەرد تاڵەبانی داواشی لە خاوەنی پرۆژەی شیری نایاب و پرۆژەكانی تری كشتوكاڵی كرد، لەدانانی ستافی كار ئەولەویەت بۆ دەرچوانی كۆلیژەكانی كشتوكاڵی و سامانی ئاژەڵی بێت. خاوەنی پرۆژەی شیری نایاب لەگەڵ پێزانین بۆ سیاسەتی ئێستای وەزارەت بۆ هاوكاریكردنی كەرتی تایبەت لەپێناو سوودمەندبوونی جوتیاران و هاندانیان ئاماژەی بەوەشكرد، هەماهەنگی لەنێوان كەرتی تایبەت و گشتیدا پاراستنی بەرهەمی ناوخۆییە و دروستكردنی ئاسایشی خۆراكە.