بەڕێز عەبدولستار مەجید وەزیری كشتوكاڵ و سەرچاوەكانی ئاو پێشوازی كرد لە خاتوو مارینا ئەلغول سەرۆكی رێكخراوی كاریتاسی كۆماری چیك و شاندێكی یاوەری كە پێكهاتبوو لە عەبدولسەلام دوجان بەڕێوەبەری پڕۆژەكان و سەوسەن عەبدولجەبار شارەزای كشتوكاڵ و سارا عومەر راوێژكار لە رێكخراوەكە، لە دیدارەكەدا باس لە چالاكیی رێكخراوەكە كرا لە بواری هاوكاریی مرۆیی كە دوو بوار لەخۆدەگرێت، یەكەمیان پڕۆژەی هاوكاریی لێقەوماوان لە گەڕاوەكان لە خۆراك و پێداویستییەكانی ژیان لە خەڵكی موسڵ، دوومیشیان بریتییە لە پرۆژەیەكی كشتوكاڵ و هاوكاریكردنی جووتیارانی كوردستان كە یەكەم هەنگاو لە هەولێرەوە دەست پێدەكرێت بە پێدانی زانیاریی تەكنیكی و زیادكردنی بەرهەم و بەبازاڕكردن لە رێگەی پڕۆپۆزەڵەوە راوێژكاری لە بواری كشتوكاڵ و بزنس بەپێی ستاندەری ژینگەیی پێشكەش دەكرێت، لە تەوەرێكی دیكەی دیدارەكەدا باس لە بەستنی كۆنفرانسێكی رێكخراوەكە كرا كە بەنیازە لە مانگی ئەیلول ببەسترێت، كە بەڕێز وەزیری كشتوكاڵ و سەرچاوەكانی ئاو دەیكاتەوەو ژمارەیەكی زۆری ئەكادیمیست و شارەزاو پسپۆڕی كشتوكاڵی تێیدا بەشداردەبن بۆ گفتوگۆكردن لەسەر پلانی ستراتیژیی كشتوكاڵ و بوارەكانی پێشخستنی بەپێی تەكنیك و شارەزایی سەردەم، لەلای خۆیەوە عەبدولستار مەجید سوپاسی رێكخراوەكەی كردو پشتگیریی تەواوی بۆ سەرخستنی چالاكییەكانی و بەستنی كۆنفراسەكە خستەڕوو.