بێگەرد تاڵەبانی، وەزیری كشتوكاڵ و سەرچاوەكانی ئاو كە بەسەرۆكایەتی شاندێكی حكومەتی هەرێم لە پۆڵۆنیایە دەڵێت: لەگەڵ جێگری سەرۆكی پەرلەمانی پۆزنانی پۆڵۆنیا سەردانی چەند كارگەیەكی هاوچەرخمان كرد، یەكێك لەكارگەكان بەرهەمهێنانی رۆن بوو، چەندین جۆری رۆنی بەرهەم دەهێنا، لەگەڵ سەرپەرشتیارانی كارگە گفتوگۆمان كرد بۆ ئەوەی ئەم پێشكەوتنە بۆ جوتیارانی كوردستان بگوازینەوە، ئەوەی زۆر سەرنجی راكێشام ئەم كارگەیە خێزانی بوو، خانەوادەیەك وەك تیم كاریان تیادا دەكرد ببوە بژێوی ژیانیان و ناوبانگێیان پێیەوە دەركردبوو. هەروەها سەردانی پڕۆژەیەكی هاوبەشی حكومەت، زانكۆ و كەرتی تایبەتمان كرد كە چەندین ئامێری پێشكەوتووی تیادا بەكار هاتبوو، پەینی سروشتی، كارەبا، غاز و ئاوی گەرمی دابین دەكرد لە پاشەڕۆی ئاژەڵ و پاشماوەی خۆراكی، لەگەڵ حكومەت و زانكۆكە گفتوگۆی وردمان كرد لەسەر گواستنەوەی ئەم شێوازو پێشكەوتنە بۆ كوردستان