بەڕێز عەبدولستار مەجید وەزیری كشتوكاڵ و سەرچاوەكانی ئاو لە دیوانی وەزارەت پێشوازی كرد لە بەڕێزان نەوزاد هادی پارێزگاری هەولێر و عەلی رەشید سەرۆكی ئەنجومەنی پارێزگا، لە دیدارەكەدا بە ئامادەبوونی بەڕێوەبەرانی گشتیی پلان و بەدواداچوون و باخداری و دارستان و لەوەڕگا ،باس لە چەندین تەوەركرا لەوانە هەوڵدانی هەمەلایەنە بۆ جێبەجێكردنی پڕۆژەی ئاوی شەمامك كە دوای تەواوكردنی دەتوانێت 80 هەزار دۆنم زەویی كشتوكاڵی بەراوبكات، وێڕای سوودی بۆ بووژاندنەوەی بواری گەشتوگوزارو جوانكردنی ناوچەكە، لە لایەكی دیكەوە پارێزگاری هەولێر رۆشنایی خستە سەر پڕۆژەی دەرچوونی ئاوی زێراب و ئاوەڕۆكان كە لە شاری هەولێر دەردەچێت و پاككردنەوەیان لەسەر قەرزی وڵاتی ژاپۆن لەم رووەو داوای كرد كە پڕۆژەی ئاودێریی بۆ ئەنجام بدرێت، تەوەرێكی دیكەی دیدارەكە تایبەت بوو بە ناوچەی سەوزایی و بۆ ئەم مەبەستە هەندێك زەوی تەرخان بكرێت بۆ نەمامگەكان كە دەرچووانی كۆلیژو پەیمانگاو ئامادەییەكانی كشتوكاڵ كاری تێدا بكەن، هەردوولا كۆك بوون لەسەر زیاتر هاوكاری و هەماهەنگی بۆ خزمەتكردنی بواری كشتوكاڵ و ئاودێری و بووژاندنەوەی رووبەری سەوزایی لە سنووری پارێزگای هەولێردا.