وەزارەتی كشتوكاڵ و سەرچاوەكانی ئاو بڕیاری دا كە بڕی گۆشتی مریشكی هاوردە لە دەرەوە بۆ هەرێمی كوردستان بە رێژەی 50% كەم بكاتەوە، دكتۆر ئەنوەر عومەر قادر بەڕێوەبەری گشتی پلان و بەدواداچوون و وتەبێژی وەزارەت لەم رووەوە رایگەیاند: وەزارەتی كشتوكاڵ و سەرچاوەكانی ئاو بەمەبەستی پاراستنی بەرهەمی مریشكی خۆماڵی كە لەم ماوەیەدا نرخی زۆر هەرزان بووەو بۆ ئەوەی خاوەن كێڵگە پەلەوەڕیییەكان زەرەرمەند نەبن، بڕیاری دا گۆشتی مریشكی هاوردە لە دەرەوە بۆ ناو هەرێمی كوردستان بە رێژەی 50% لەو بڕەی پارێزگاكان داوای دەكەن بۆ بازاڕ كەم بكرێتەوە، وتەبێژی وەزارەت ئاماژەشی بەوە كرد كە رێگەش دەدرێت هەر بۆ رەچاوكردنی بەرژەوەندیی خاوەن كێڵگەكانی پەلەوەر بە هەناردەكردنی بەرهەمی مریشكی خۆماڵی هەرێمی كوردستان بۆ پارێزگاكانی عێراق.