بە ئامادەبوونی بەڕێز عەبدولستار مەجید وەزیری كشتوكاڵ و سەرچاوەكانی ئاوو خاتوو پاوڵا ناردینی جێگری كونسوڵگەریی ئیتاڵیا و بەڕێزان ئەندامانی لیژنەی كشتوكاڵ و ئاودێری و ڤێتێرنەری لە پەرلەمانی كوردستان و ژمارەیەك لە بەڕێوەبەرانی گشتی و پسپۆڕو فەرمانبەرانی پەیوەندیدار و سەرۆك و ئەندامانی كۆمەڵەی هەرەوەزیی زەیتوون و جووتیاران، لە شاری هەولێر بە فەرمی كارگەی گوشینی زەیتی زەیتوون كرایەوە ، سەرەتا وەزیری كشتوكاڵ و سەرچاوەكانی ئاو لە وتەیەكدا وێڕای پیرۆزبایی كردن لە جووتیاران كە لەمەودوا بەرهەمەكانیان دەهێننە ئەم كارگەیە بۆ بەرهەمهێنانی زەیتی زەیتوون، سوپاسی حكومەتی ئیتاڵیا و پەیمانگای (سام)ی ئیتاڵی و ستافی وەزارەت و كۆمەڵەی هەرەوەزیی زەیتوونی كرد كە توانیان بە هەوڵ و تەقەلای هەموو لایەك ئەم كارگە نۆبەرەیە بگەیەننە قۆناخی كردنەوەو بەرهەمهێنان، دووپاتیشی كردەوە كە ئەم كارگەیە بە هەوڵ و كۆششی وەزارەت دامەزرا لەرێی پەیوەندی و سەردانی راستەوخۆ بۆ وڵاتی ئیتاڵیا و بە هەماهەنگی لەگەڵ وەزارەتی دەرەوەو پەیمانگەی (سام)ی ئیتاڵی، ئاماژەشی بەوە كرد كە ئەم كارگەیە سەرەتایەكە بۆ سوودوەرگرتن لە بەرهەمی زەیتوونی خۆماڵیی و سوودگەیاندن بە جووتیاران و هاندانیان كە خۆیان زیاتر ماندووبكەن بۆ بەرهەمهێنانی زەیتوون، گوتیشی كە كارگەكە توانای بەرهەمهێنانی یەك تەن و نیوی لە سەعاتێكدا هەیەو هەر تەنێكی زەیتوونیش بە 75 هەزار دینار بۆ جووتیاران دەكاتە زەیت و ئەوانیش ئازادن بە فرۆشتنەوەی زەیتەكە بە كۆمەڵەی هەرەوەزیی زەیتوون يان خۆیان وەریبگرنەوە، دواتر جێگری كونسوڵگەریی ئیتاڵیا لە وتەیەكدا سوپاسی تایبەتیی بەڕێز وەزیری كشتوكاڵ و سەرچاوەكانی ئاوی كرد بۆ هەماهەنگی و هاوكاریی راستەوخۆ لەگەڵ ستافی وڵاتەكەی بۆ بە ئەنجامگەیاندنی ئەم پڕۆژەیە و دووپاتی كردەوە كە حكومتەكەی زیاتر بەردەوام دەبێت لە بواری هاوكاریكردنی هەرێمی كوردستان بە تایبەتیش لە كەرتی كشتوكاڵدا، ئینجا خەڵاتی رێزلێنان بەسەر ئەو كەس و لایەنانە دابەشكرا كە هاوكارو هەماهەنگ بوون لە سەركەوتنی ئەم هەوڵە و دامەزراندن و كردنەوەی كارگەكە، لەپاشاندا بەیاوەریی میوانان چوونە نێو كارگەكەوە، بە فەرمی و راستەوخۆ كارگەی بەرهەمهێنانی زەیتی زەیتوونیان كردەوە و لە نزیكەوە بە وێستگەكانی بەرهەمهێنان ئاشنابوون، ، ماوە بگوترێت كە كارگەی گوشینی زەیتی زەیتوون راستەوخۆ لەلایەن وەزارەتی كشتوكاڵ و سەرچاوەكانی ئاوەوە رادەستی كۆمەڵەی هەرەوەزیی زەیتوون كراوەو خۆشیان سەرپەرشتی بەرهەمهێنان دەكەن.