وەك هەفتەكانی پێشتر ئەندامانی لیژنەی بەدواداچوونی كێشەكان لە دیوانی وەزارەت لەگەڵ جووتیاران و بەرهەمهێن كۆبۆوە، ، لە میانی ئەو دیدارەدا جووتیاران و بەرهەمهێنان بە هەموو راشكاوییەكەوە باسیان لە كێشەكانیان كرد لەوانە ژمارەیەك لە جووتیاران باسیان لە گرفتی یەكلایی كردنەوەی كێشەی زەوی وزار و ئەو جووتیارانەی كە تاپۆی زەویان هەیە لەلایەن شارەوانی و لایەنی پەیوەندیدارەوە مافیان بۆ دابین نەكراوە ،هاوكات هەندێ لە هاووڵاتیان بابەتی دیكەیان خستە بەردەم لیژنەكە تایبەت بە بەروبوومی كشتوكاڵی و پشتیوانی كردن لە كەمكردنەوەی رۆتین لە فەرمانگەكاندا، لەم رووەوە دووپات كرایەوە كە ئەو لیژنەیەی لە وەزارەت پێكهێنراوە لەنزیكەوە بە كێشەكانیان ئاشنا دەبێت و بەردەوامیش لە پەیوەندی كردندا دەبێت بە لایەنی پەیوەندیدار لە رێگەی نووسراوی فەرمی هاوكات دووپاتی كردەوە كە پێویستە رایی كردنی مامەڵەی جووتیاران لەكاتی سەردانی فەرمانگەكانی سەر بە كشتوكاڵ دوور لە هەموو رۆتینێك بەڕێوەبچێت تاكو چی دیكە لەم سەردان و بەدواداچوونانەو ئەرك و ماندووبوون نەكێشن، ئەم كۆبوونەوانەش هۆكارێكی گرنگن بۆ ئەوەی زیاتر لە نزیكەوە بە داواكاری و كێشەكان ئاشنابن، لەم ماوەیەشدا لیژنەكە چالاكییەكی بەرچاوی هەبووە لە بەدواداچوونی ئەو كێشەو گرفتانە، لە كۆبوونەوەی ئەم هەفتەیەشدا جەخت كرایەوە كە پێویستە هەموو بەرپرسانی پەیوەندیدار لە فەرمانگەكانی سەر بە وەزارەت بە شێوازێكی سەردەمیانە كاروباری جووتیارو هاووڵاتیان رایی بكەن و بەدواداچوونی بەردەوامیان بۆ بكەن.