لە چوارچێوەی دەستپێكردنی بودجەی پڕۆژەكانی هاندانی جووتیاران( الاعانات الزراعیە) بۆ ساڵی 2015، كە توانرا 50%ی بودجەی ساڵی2013 لە وەزارەتی دارایی و ئابووری بۆ ئەم بابەتە دابین بكرێت، ئەمڕۆش بەڕێز عەبدولستار مەجید وەزیری كشتوكاڵ و سەرچاوەكانی ئاو دەستپێكردنی خەرجكردنی پڕۆژەی هاندانی بەبازاڕكردنی گۆشتی پەلەوەڕی راگەیاند، كە بڕی 7 ملیارو 710 ملیۆن دینار بۆ هەر چوار پارێزگا و ئیدارەی گەرمیان تەرخانكراوە،بەم پێیە وەزارەت لە هەر پارێزگایەك گرێبەست لەگەڵ كۆمپانیایەك دەكات بۆ گەیاندنی بەروبوومی كێڵگەكان بۆ سەربڕخانە و دواتر بە بازاڕكردنیان كە لە بەرژەوەندیی خاوەن كێڵگەكاندایە. وەزارەتیش سەبارەت بە تەرخانكردنی پارەی پڕۆژەی بەبازاڕكردنی گۆشتی پەلەوەڕ بۆ هەر پارێزگایەكیش بەم شێوەیەیە كە بۆ هەولێر بڕی 2 ملیار و 900 ملیۆن دینار و بۆ سلێمانی 2 ملیار و425 ملیۆن دینار و بۆ دهۆك 1 ملیارو500 ملیۆن دینار و بۆ ئیدارەی گەرمیانیش بڕی 885 ملیۆن دینار تەرخانكراوە.ئەمەو بۆ ڕۆژانی دواتریش لە پڕۆژەكانی دیكە رادەگەیەنرێت.