بەڕێز عەبدولستار مەجید وەزیری كشتوكاڵ و سەرچاوەكانی ئاو لە دیوانی وەزارەت پێشوازی كرد لە بەڕێز كاروان بارزانی سەرۆكی پڕۆژەی ئەسپسواریی كوردستان و شاندێكی یاوەری كە لە ژمارەیەك پسپۆڕی بیانی پێكهاتبوو، لە دیدارەكەدا كە بەڕێز محەمەدەمین فارس بەڕێوەبەری گشتیی سەرچاوەكانی ئاو ئامادەی بوو، سەرەتا وەزیری كشتوكاڵ و سەرچاوەكانی ئاو پیرۆزبایی لە بەڕێز كاروان كرد بۆ ئەم پڕۆژەیە كە تاكە لە هەرێمی كوردستان و عێراق و رۆژهەڵاتی ناوەڕاست و هیوای سەركەوتنی بەردەوامی بۆ خواست، دواتر باسیان لەو رێنمایی و یاساو رێسایانە كرد كە لەگەڵ رێنمایی و یاساكانی رێكخراوی ڤێتێرنەریی جیهانی IOM بگونجێت بۆ خزمەتكردنی ئامانجەكانی ئەم پڕۆژەیە، هاوكات رۆڵی بەڕێوەبەرایەتیی گشتی ڤێتێرنەری و سامانی ئاژەڵیی سەر بە وەزارەت خرایە ڕوو كە لەم بوارەدا هاوكار بێت لەگەڵ ئەم پڕۆژە گرنگە، لەلای خۆشیەوە كاروان بارزانی سوپاسی وەزیری كرد بۆ ئەم پێشوازییەو هیوای پێشكەوتن و سەركەوتنی بۆ خواست لە بەدیهێنانی ئەركەكانی بۆ بووژاندنەوەی سێكتەری كشتوكاڵ لە هەرێمی كوردستاندا.