لە میانی كۆبوونەوەی لیژنەی بەدواداچوونی كێشەكانی سەر بە وەزارەت كە هەموو رۆژانی سێ شەممە لەگەڵ جووتیارو بەرهەمهێنان ئەنجام دەدرێت، بەڕێزعەبدولستار مەجید وەزیری كشتوكاڵ و سەرچاوەكانی ئاو راستەوخۆ گوێی لە ژمارەیەك لە خاوەن كێشەكان گرت، كە هەندێكیان پەیوەست بوون بە كێشەی زەوییەكانی جووتیاران كە بەر ماستەرپلانی شارەوانی كەوتوون، لەوانە ئەو زەویانەی كە كاتی خۆی لە هەڵەبجەو سیروان و سەید سادق لەلایەن شارەوانیی ئەو شوێنانە دەستیان بەسەرداگیرابوو، بەڵام لە سەردانی ئەم دواییەی بەڕێز وەزیر جەختی كردبۆوە كە دەبێت وەك موڵكی كشتوكاڵی بۆ جووتیارانی ئەو ناوچانە بگەڕێندرێنەوە، لە كۆبوونەوەكەدا عەبدولستار مەجید دووپاتی كردەوە كە دوای گفتوگۆكردن و تەئكیدكردن و بەدواداچوون كێشەكە بەرەو چارەسەر دەچێت و موڵكەكان بۆ جووتیاران دەگەڕێنەوە. لەلایەكی دیكەوە گوێی لە كێشەی چەند كەسێك گرت كە لە هەندێ ناوچە داوای قەرەبوو دەكەنەوە لەبەر ئەوەی بە هەمان شێوە زەوییەكانیان بەر سنووری شارەوانی كەوتووە، هەر لەم كۆبوونەوەیەدا جارێكی دیكە جەختی كردەوە كە وەزارەت بەردەوامە لە بەدواداچوونی ورد بۆ داخوازی و كێشەكان، هاوكات چەندین كێشەی دیكە چارەی گونجاویان بۆ دەست نیشان كرا.