بە مەبەستی چارەسەركردنی كێشەی زەوی و زاری گوندی گەلیاوەی سەر بە كۆمەڵگەی بەستۆڕە بەڕێزعەبدولستار مەجید وەزیری كشتوكاڵ و سەرچاوەكانی ئاو لە نووسینگەی خۆی لە دیوانی وەزارەت بە ئامادەبوونی ئەندامانی لیژنەی چارەسەركردنی كێشەی جووتیاران پێشوازی كرد لە سەعید مەسیفی ئەندام پەرلەمانی كوردستان بە یاوەریی ژمارەیەك لە جووتیارانی گوندی ناوبراو، لە دیدارەكەدا بە تێروتەسەلی باس لە كێشەی زەویی گوندی گەلیاوە كرا كە شارەوانیی بەستۆڕە دەیەوێت زەوییەكانیان بكوژێنێتەوە بە مەبەستی دروستكردنی پڕۆژەیەكی پیشەسازی، لەم رووەوە وەزیری كشتوكاڵ و سەرچاوەكانی ئاو دووپاتی كردەوە كە وەك وەزارەت داكۆكیی تەواو لە داخوازیی جووتیاران دەكات كە داوایان كردبوو زەوییەكانیان نەكوژێنرێتەوە و هاوكاری بكرێن، هاوكات وەزارەت بە هەماهەنگی لەگەڵ شارەوانیی بەستۆڕە لیژنەیەك پێك بهێنن تاكو لەنزیكەوە لەم كێشەیە بكۆڵنەوەو رێگە چارەی بۆ دەست نیشان بكەن.