ماجید دەباغ بەڕێوەبەری راگەیاندنی وەزارەتی كشتوكاڵ و سەرچاوەكانی ئاوی حكومەتی هەرێم رای دەگەیەنێت، لەمڕۆوە وەزارەتەكەی لەپێناو پاراستن و ساغبونەوەی بەرهەمی سێوی خۆماڵی بۆ هەر كیلۆیەك 350 دینار باج دەخاتە سەر سێوی هاوردەكراو، ئەم باج خستنە سەرەش تا كۆتایی ئەمساڵ درێژەی دەبێ. بەڕێوەبەری راگەیاندنی وەزارەتی كشتوكاڵ و سەرچاوەكانی ئاوی حكومەتی هەرێمی كوردستان لەلێدوانێكی رۆژنامەوانیدا گوتی، وەزارەتی كشتوكاڵ و سەرچاوەكانی ئاو بەهاوئاهەنگی لەگەڵ وەزارەتی دارایی و ئابوری حكومەتی هەرێم باج دەخاتە سەر بەروبومی سێوی هاوردەكراو، ئەم هەنگاوەش بۆ ئەوەیە هاوسەنگی لەكاتی پێگەیشتنی بەروبومی خۆماڵی بێتە دروست بوون و بەرهەمی خۆماڵی ساغ ببێتەوە. هەروەها گوتی، چەند رۆژێكە بەروبومی سێوی خۆماڵی پێگەیشتووە، بۆ ئەوەی جوتیارانی خۆماڵی زیان نەكەن، بەڵكو سود بكەن و بەرهەمەكانیان ساغ ببێتەوە، لەمڕۆوە بۆ هەر كیلۆیەك سێوی هاوردەكراو لەدەرەوە 350 دینار، واتە بۆ هەر تۆنێك 350 هەزار دینار باجی دەخرێتەسەر. راشیگەیاند: باج خستنە سەر سێوەش كە لەمڕۆوە (شەموو)دەست پێ دەكاو تا رۆژی 1/12ی كۆتایی ئەمساڵ درێژەی دەبێ، راگرتنی هاوسەنگی لەبازاڕەكانی هەرێم پێویستن بۆ ئەوەی جووتیاران بە ئاسانی لەساتی پێگەیشتنی هەر بەروبومێكی خۆماڵی بەرهەمەكانیان ساغ ببێتەوە.