ماجید دەباغ بەڕێوەبەری راگەیاندنی وەزارەتی كشتوكاڵ و سەرچاوەكانی ئاوی حكومەتی هەرێم رەتی دەكاتەوە قەدەغەكردنی فرۆشتنی مریشكی زیندوو لەدوكان و سەر شەقامەكان مەبەست لێی بێ كاری كردنی كاسبكاران بێ، ئاماژە بۆ ئەوەش دەكات، بۆ لەمەو دوا وەزارەت رێنمایی دەردەكات بە راوێژ لەگەڵ وەزارەتە پەیوەندیدارەكان بۆ رێكخستن و بە سیستەمكردنی ئەم كارە و لە داهاتوو ئەوانەی مۆڵەت وەردەگرن دەچنە ناو سیستەمی بە بازاڕكردنی مریشك كە وەزارەت لە ئەستۆی دەگرێت و ئەو كاتە بۆیان هەیە مریشكی فرێش و بەستوو بفرۆشن . ماجید دەباغ رایگەیاند، قەدەغەكردنی فرۆشتنی مریشكی زیندوو لەدوكان و سەر شەقامەكان كە دوور بووە لە رێنماییە تەندروستییەكان، هاوكات مەترسی بڵاوبوونەوەی ڤایرۆسی ئەنفلوەنزای باڵندەشی لێ دەكرێ، بۆ رێگرتن بووە لەبڵاوبونەوەی ئەم نەخۆشییە. هەروەها گوتی، مەبەستی سەرەكی قەدەغەكردنی فرۆشتنی مریشكی زیندوو لەو شوێنانە كە لەرووی تەندروستییەوە رێگەپێدراو نییە، بۆ كۆنترۆڵ كردنە لەو بڵاو بوونەوەی ئەو ڤایرۆسە، نەك مەبەست لێی بێ كاری كردنی كاسبكاران بێ. ئاماژەی دا، فرۆشتنی مریشكی زیندوو لەدوكان و سەر شەقامەكان بەر لەهەموو كەسێك مەترسی لەسەر گیانی ئەو كاسبكارانەو پاشان كۆی هاونیشتمانان دروست دەكات.