بەڕێز عەبدولستار مەجید وەزیری كشتوكاڵ و سەرچاوەكانی ئاو بە یاوەریی بەڕێوەبەری گشتیی ڤێتێرنەری و سامانی ئاژەڵ و بەڕێوەبەری كەرەنتین و شاندێكی وەزارەت بەشداریی كرد لە چوارەمین کۆنگرەی نێودەوڵەتيی بۆ گۆشتی پەلەوەر كە لە ئەنتالیای وڵاتی توركیا بەڕێوەچوو، لە پەراوێزی ئەم كۆنگرەیەدا بەڕێزی بە ئامادەبوونی شاندی یاوەری، چاوی بە محەمەد دانەش جێگری وەزیری كشتوكاڵی توركیا و راوێژكاری وەزیرو سەرۆكی یەكێتیی هاوردەكارانی توركیا كەوت، لە میانی دیدارەكەدا چەندین تەوەر باسیان لێوەكرا، لەوانە: * كوالیتی كۆنتڕۆل، لەم رووەوە جەختكرایەوە لەسەر باشتركردنی كوالیتی ئەو پەلەوەڕەی هاوردەی هەرێمی كوردستان دەكرێت، بە تایبەتیش ئاگاداركردنەوەی وەزارەتی كشتوكاڵ و سەرچاوەكانی هەرێم لەكاتی بوونی نەخۆشی لە هەر ناوچەیەك، هەروەها كەمكردنەوەی ماوەی بەرواری بەسەرچوونی هێلكە كە بە پێی مواسەفاتی عێراقی بێت، كە تەنیا یەك مانگە. * واژۆكردنی پڕۆتۆكۆڵ لە گەڵ وڵاتی توركیا و ئاماژەكردن و جەختكردنەوە لەسەر چەند خاڵێك كە لەم پڕۆتۆكۆڵە جێگیربكرێن تایبەت بە بەروبوومی ئاژەڵ. * كاراكردنی لیژنەی هەماهەنگیی نێوان هەرێمی كوردستان و توركیا بۆ چارەسەركردنی هەر كێشەیەك كە بێتەئاراوە. جەنابی وەزیری كشتوكاڵ و سەرچاوەكانی ئاوی هەرێم لەم دیدارەدا چەندین گلەیی خستە بەردەم شاندی كشتوكاڵی توركیا سەبارەت بە بوونی رێژەیەكی زۆری ئاو لەنێو مریشكی بەستوودا، لەگەڵ هەبوونی هەندێ حاڵەتی ناتەواوی و بوونی پیسایی لەسەر هێلكەی هەناردەكراو.. ئەمەو جێگری وەزیری كشتوكاڵی توركیا بەڵێنی دا كە لەنزیكەوە بەدواداچوون بۆ سەرجەم ئەو خاڵ و گرفت و گلەییانە بكات كە لەم دیدارەدا خرانەڕوو.