بەڕێز عەبدولستار مەجید وەزیری كشتوكاڵ و سەرچاوەكانی ئاو بە یاوەریی بەڕێوەبەرانی گشتیی دیوان و سەرچاوەكانی ئاوو و ژمارەیەك لە بەرپرسانی دیكەی وەزارەت سەردانی سنووری گوندی ئەشكەوسەقاو زەوییەكانی جووتیارانی دەڤەرەكەی كرد، لەمیانی ئەو گەشتەدا لەنزیكەوە چاوی بە جووتیاران كەوت، دووپاتیشی كردەوە كە وەزارەت بەپێی توانا ئاسانكاریی بۆ جووتیارانی هەرێمی كوردستان دەكات لەپێناو پاراستنی بەرهەمی ناوخۆ لە رێگەی قەدەغەكردنی هاوردەی سەوزەو میوەو لەكاتی پێگەیشتنیدا یان بە دانانی باج لەسەر ئەو بەرهەمە هاوردەیە، دواتر گوێی لە كێشەو پێداویستییەكان گرت و دەستخۆشیشی لە جووتیاران كرد كە بەو توانا سنووردارە گەشە بە بەرهەمەكانیان دەدەن، ئەمەش بەڵگەی دڵسۆزی و پابەندبوونە بە خاك و پیشە پیرۆزەكەیان، هاوكات باس لە كێشەی كەمئاویی و پێویستی دەڤەرەكە كرا، ئاماژە بەوە كرا كە وەزارەت لە رێی بەنداوو پۆندەكان چارەسەری ئەم كێشەیە دەكات، بەڵام لەبەر قەیرانی دارایی هەندێ لە كارەكانی تەواوكردنی ئەو پۆندو بەنداوانە رووبەڕووی سستی بوونەتەوە.