بەدواداچوونی ورد لە كێشەكانی جووتیاران بە پێی رێنماییەكان و لەنزیكەوە ئاگاداربوون و گوێ گرتن لە داخوازییەكانیان ناوەڕۆكی كۆبوونەوەی ئەمڕۆی لیژنەی بەدواداچوونی كێشەكانی سەر بە وەزارەت بوو، بە سەرپەرشتیی بەڕێز عەبدولستار مەجید وەزیری كشتوكاڵ و سەرچاوەكانی ئاو لەگەڵ ژمارەیەك لە جووتیارو بەرهەمهێن، لەسەرەتای كۆبوونەوەكەدا باس لە كێشەی زەوی و زاری گوندی كەلكانی سەربە ناحیەی خدرانی قەزای دوكان كرا كە كێشەیەكی كۆنی نێوان موڵكدارو جووتیارانە، دوای گفتوگۆی تێروتەسەل و هەوڵی لیژنەی تایبەتی وەزارەت بەبەشداریی بەرپرسانی یەكە ئیدارییەكان لە ناوچەكەدا توانرا بگەنە چارەسەرێكی گونجاو كە ئەم ساڵیش وەكو ساڵانی رابردوو جووتیاران زەوییەكانیان بكێڵن و لیژنەی تایبەتیش لە ئێستاوە دروستكراو دەست بەكاردەبێت بۆ رێكاری دابەشكردنەوەی یەكەی دابەشكردن لە گوندەكە، هەر لەم كۆبوونەوەەیەدا چەندین كێشەی دیكە چارەی گونجاویان بۆ دەست نیشان كرا، دووپاتیش كرایەوە كە چارەسەركردنی هەندێ لەو گرفتانە بە رێگەی لیژنەی پسپۆڕ و بە هاوكاریی یەكە ئیدارییەكان لە شارو شارۆچكەكان ئەنجام دەدرێت.