دوابەدوای كۆبوونەوەكەی لیژنەی باڵای بەرەنگاربوونەوەی ئەنفلەوەنزای باڵندە كە لە بینایەی وەزارەتی ناوخۆ سەبارەت بە سەرهەڵدانی ئەنفلەوەنزای باڵندە سازكرا و تێیدا چەندین رێنمایی و بڕیار دەرچوون، بەڕێز عەبدولستار مەجید وەزیری كشتوكاڵ و سەرچاوەكانی ئاو بە ئامادەبوونی بەڕێوەبەری گشتیی سامانی ئاژەڵ و ڤێتێرنەری لە كۆنگرەیەكی رۆژنامە نووسیدا كە لە بینای وەزارەت بەڕێوەچوو بە تێرو تەسەلی وەڵامی پرسیاری پەیامنێرو میدیاكارانی دایەوە و رۆشنایی خستە سەر خاڵە گرنگەكان و ئەو بڕیارانەی كە لە بەرژەوەندیی هاووڵاتیان دەرچوون بۆبەرەنگاربوونەوەی هەر حاڵەتێكی نەخوازراو لە بڵاوبوونەوەی ئەنفلەوەنزای باڵندە، لەوانەش قەدەغەكردنی فرۆشتنی مریشكی زیندوو لە بازاڕ و شەقام و كۆڵان و دوكانەكان و داخستنی بازاڕەكانی پەلەوەڕی كێوی تا ئاگادارییەكی دیكە،ە هەروەها مریشكی كێڵگەكانی پەلەوەڕ بە پێی رێنمایی كوشتارگە تەنیا لە كوشتارگەی پەلەوەڕ و لەژێر سەرپەرشتی پزیشكی ڤێتێرنەری سەرببڕدرێت، هاوكات راگرتنی گواستنەوەی مریشكی زیندوو تا ئاگاداركردنەوەیەكی دیكە لە نێوان پارێزگاكاندا، وێڕای چەندین خاڵی دیكە كە لە رێنماییەكان و بڕیارەكانی كۆبوونەوەكەی لیژنەی باڵای بەرەنگاربوونەوەی ئەنفلەوەنوزای باڵندە ئاماژەیان پێكرابوو، لە كۆتاییشدا داوای لە میدیاكارەو سەرجەم دەزگاكانی راگەیاندن كرد كە لە ئاستی بەرپرسیاریەتیدا بن لە مامەڵەكردن لەگەڵ ئەم پرسە هەستەوەرو گرنگە.