لە دیدارێكی نێوان بەڕێز عەبدولستار مەجید وەزیری كشتوكاڵ و سەرچاوەكانی ئاو و ئەندامانی لیژنەی كشتوكاڵ و ئاودێری و ڤێتێرنەری لە پەرلەمانی كوردستان بە ئامادەبوونی بەڕێوەبەرانی گشتیی وەزارەت، جەختكرایەوە لەسەر بەدواداچوون بۆ بەبازاڕكردنی گەنمی ئەم ساڵی جووتیاران و رادەستكردنی بە سایلۆكانی هەرێمی كوردستان، لەم رووە ئاماژە بەو كۆبوونەوەیە كرا كە رۆژی پێشتر لە دیوانی وەزارەت بە سەرپەرشتی وەزیر لەگەڵ بەڕێوەبەرانی سایلۆكانی كوردستان ئەنجامدرا، كە تێیدا چەندین بڕیارو راسپاردە بۆ كەمكردنەوەی رۆتین لە سەروبەندی پرۆسەی رادەستكردنی بەرهەمی گەنمی جووتیاران دەرچوون، ئەندامانی لیژنەی كشتوكاڵی پەرلەمان وێڕای دەستخۆشییكردن لە وەزارەتی كشتوكاڵ و سەرچاوەكانی ئاو بۆ ئەو بڕیارانەی كە لە بەرژەوەندیی جووتیاراندا دەریكردوون، دووپاتیان كردەوە كە لە ئێستادا جووڵەیەكی بەرچاو كەوتۆتە نێو جووتیاران كە بە بەراورد لە ساڵانی پێشتر زیاتر روویان كردۆتە كێڵگەكان ئەمەش بە پشتیوانیی وەزارەت و لایەنە پەیوەندیارەكانە لە جووتیاران و هاندانیان بۆ ئەوەی زیاتر خزمەتی بەرهەمی خۆماڵی بكەن، ئاماژەشیان بەوە كرد كە پرۆسەی دانانی باج لەسەر بەروبوومی هاوردە زیاتر كۆنتڕۆڵ بكرێت و بایەخی زیاتری پێ بدرێت و بازاڕی ساخكردنەوە بۆ جووتیاران بدۆزرێتەوە، هەر لەم دیدارەدا وەزیرو ئامادەبووان جەختیان كردەوە لەسەر یەكخستنی كاروباری عەلوەكان لە سەرتاسەری هەرێمی كوردستان بە بوونی مەرجەعێك بۆ سەرپەرشتیكردن و رێكخستنی بە شێوەیەكی پووختەتر، لەم بارەوە عەبدولستار مەجید ئەم هەنگاوەی بە چاك هەڵسەنگاندو داوای لە لیژنەی كشتوكاڵ و ئاودێری و ڤێتێرنەری پەرلەمان كرد كە راپۆرتێك بۆ سەرۆكایەتیی ئەنجومەنی وەزیران بەرزبكەنەوەو وەزارەتیش بە هەموو توانایەكەوە پشتیوانیی لەم بۆچوون و پێشنیارە دەكات.