بەڕێز عەبدولستار مەجید وەزیری كشتوكاڵ و سەرچاوەكانی ئاو دووپاتی كردەوە كە وەزارەت وەك پشتگیرییەك بۆپاراستن و ساخكردنەوەی بەرهەمی خۆماڵیی جووتیاران بڕیاری داوە لە جیاتی دانانی باج لەسەر بەرهەمی هاوردە لە كاتی پێگەیشتنی بەرهەمی خۆماڵی لە سەوزەو میوە كە پێشتر پەیڕەو دەكرا، هەموو بەرهەمێكی هاوردەی وڵاتان بە عێراقیشەوە قەدەغە بكرێت، بەڕێزیان لەمیانی كۆبوونەوەی رۆژی سێ شەممە لەگەڵ ژمارەیەك لە جووتیاران بە ئامادەبوونی لیژنەی بەدواداچوونی كێشەكانی سەر بە وەزارەت روونی كردەوە كە وەزارەت بەردەوامە لە جێبەجێكردنی پلان و بەرنامەكانی خۆیان وێڕای ئەو قەیرانە داراییە، دووپاتیشی كردەوە كە بەردەوامە دەبین لە بەدواداچوونی ورد بۆ داخوازی و كێشەكانی جووتیاران بە پێی رێنماییەكان و لە رێگەی لایەنە پەیوەندیدارەكانەوە، دواتر گوێبیستی كێشەكان بوو، لەوانە كێشەی زەویی جووتیاران خرایەڕوو باسیان لێوەكرا، ئەمە وێڕای كێشەی بیرلێدان كە سەرنج و تێبینی دەربارەی ئەم كێشەیەش ئاماژەیان پێكرا، لەم بارەوە جەختكرایەوە كە ئەو باباتە پێویستە بەپێی رێنماییەكان چارەوسەربكرێت تاكو زیان بە ئاوی ژێرزەوی نەگات و ئاستی ئاو كەم نەكات ، وێڕای چەندین كێشەی دیكە چارەی گونجاویان بۆ دەست نیشان كرا، دووپاتیش كرایەوە كە چارەسەركردنی هەندێ لەو گرفتانە بە رێگەی لیژنەی پسپۆڕ و بە هاوكاریی یەكە ئیدارییەكان لە شارو شارۆچكەكان ئەنجام دەدرێت.