وەزارەتی كشتوكاڵ و سەرچاوەكانی ئاو رایدەگەیەنێت كە ئەرك و مەهامی وەزارەت بریتيیە لە كۆكردنەوەی ئاو و پاراستنی ئاوی هەرێمی كوردستان، بەڵام سەبارەت بە ئاوی خواردنەوەی شار و شارۆچكە و گوندەكان لە ئەركی ئێمەدا نییە و ئەركی وەزارەتی شارەوانی و گەشتوگوزارە، ماجید دەباغ بەڕێوەبەری راگەیاندن لە وەزارەتی كشتوكاڵ و سەرچاوەكانی ئاو سەبارەت بەم بابەتە روونی كردەوە كە وەزارەت لە كەميی ئاوی خواردنەوە بەرپرس نییە و ئەوەندەی پەیوەنديی بە وەزارەتەوە هەبێت مۆڵەتی لێدانی بیری ئیرتوازییە و بۆ ئەمەش ئەوەندەی وەزارەتی شارەوانی داوای كردبیت مۆڵەتیان پێدراوە، هەر چەندە ئاوی ژێرزەویش لە كەمبووندایە، بەڵام كە داواكرابێت بۆ خواردنەوەی ئاوی هاووڵاتیان مۆڵەتی ئەوەمان پێداون، بەڕێوەبەری راگەیاندن لە وەزارەتی كشتوكاڵ و سەرچاوەكانی ئاو ئاماژەی بەوە كرد كە لەم مانگەدا خودی بەڕێز پارێزگاری سلێمانی خۆی سەردانی وەزارەتمانی كرد و پێیمان راگەیاند كە لە هەر شوێنێك پێویستیان بە ئاو بێت وەزارەتی كشتوكاڵ و سەرچاوەكانی ئاو مۆڵەتی بیرلێدانیان پێدەدات بۆ ئەوەی هاووڵاتیان بێ ئاو نەبن.