بۆ چارەسەركردنی كێشەی گەڕاندنەوەی ئەو قەرزە كشتوكاڵییەی كە جووتیاران لە بانك وەریانگرتووەو لە هەوڵێكی بێ وێنەی خودی بەڕێز عەبدولستار مەجید وەزیری كشتوكاڵ و سەرچاوەكانی ئاو لەم بوارەدا سەرۆكایەتیی ئەنجومەنی وەیرانی هەرێمی كوردستان رەزامەندی دا بە دواخستنی وەرگرتنەوەی قەرزی كشتوكاڵی تاكو 31/12/2016 ، لەم بارەوە عەبدولستار مەجید رایگەیاند لە مانگی ئایاری ئەم ساڵدا نووسراومان بۆ سەرۆكایەتیی ئەنجومەنی وەزیران بەرزكردەوە و تێیدا روونمان كردەوە بەهۆی ئەو قەیرانە داراییەی كە بەرۆكی هەرێمی كوردستانی گرتۆتەوەو زۆربەی جووتیارانیش پارەی گەنمیان وەرنەگرتووە و قەرزەكانی دیكەش زۆربەیان راوەستاون و رۆژانەش جووتیاران سەردانمان دەكەن بۆ دواخستنی قەرزەكانیان، چونكە ئەو جووتیارانە خانووی نیشتەجێیان بە بارمتە داناوە بۆ وەرگرتنی قەرزەكە، لە هەمان كاتیشدا بانكی كشتوكاڵی داوای گەڕانەوەی قەرزەكەیان لێ دەكات، ئەمەش كێشەیەكی گەورەی بۆ جووتیاران درووستكردووە، لەبەر ئەوە داوامان لە سەرۆكایەتیی ئەنجومەنی وەزیران كرد رەزامەندیی بفەرموون لەسەر دواخستنی قەرزەكە تا كێشەی دارایی كۆتایی دێت و پارەی گەنمەكە وەردەگیرێت، لەم بارەوە وەزیری كشتوكاڵ و سەرچاوەكانی ئاو موژدە بە جووتیاران دەدات كە سەرۆكایەتیی ئەنجومەنی وەزیران بە سوپاسەوە رەزامەندیی دا بە دواخستنی وەرگرتنەوەی قەرزی كشتوكاڵی تا كۆتایی ئەم ساڵ واتا تاكو( 31/12/2016)، لە كۆتاییدا روونی كردەوە كە وەزارەت تا لە توانایدایە هەوڵدەدات لە پێناو بەرژەوەندی و خزمەتكردنی جووتیاران و بەرەوپێشبردنی كەرتی كشتوكاڵ لە هەرێمی كوردستاندا.