بەڕێز عەبدولستار مەجید وەزیری كشتوكاڵ و سەرچاوەكانی ئاو جەختی كردەوە كە وەزارەت بە درێژایی ئەو سێ ساڵەی رابردوودا بەردەوام بووە لە چارەسەركردن و بەدواداچوونی كێشەو داواكارییەكانی جووتیاران و سەرجەم هاووڵاتیان بە گشتی، بەڕێزی لەمیانی كۆبوونەوەی رۆژانی سێ شەممە لەگەڵ هاووڵاتیاندا لە دیوانی وەزارەت، دووپاتی كردەوە كە هەموو چارەسەرەكان بەپێی یاساو پەیوەندییەوە ئەنجامدەدرێت لەگەڵ دامودەزگاو فەرمانگەكانی وەزارەت یان لایەنی پەیوەندیدار لە حكومەتدا، دوا بەدوای ئەو پێشەكییە بە ئامادەبوونی لیژنەی بەدواداچوونی كێشەكان لەنزیكەوە گوێی لە جووتیاران گرت كە بە راشكاوی داواكاری و گرفتەكانیان خستەڕوو، لە وەڵامی داواكارییەك بۆ هاوردەكردنی جۆ لە دەرەوە بۆ دروستكردنی ئالیك روونی كردەوە كە هەر هەنگاوێك لەم شێوەیە دەبێ بە پێی رێنماییەكانی بەڕێوەبەرایەتیی گشتیی ڤێتێرنەری و سامانی ئاژەڵ بێت تا لە نزیكەوە ئاگاداربێت، هاوكات هەندێ لە هاووڵاتیان كێشەی زەوی و زارو تەملیك و زێدەڕۆییەكانیان باس كردو لیژنەكەش بەپێی یاساو رێنماییەكان وەڵامی دانەوەو دووپاتیش كرایەوە كە چ بە نووسراو یان بە پەیوەندیی راستەوخۆ لە رابردووشدا توانراوە بە دەیان لەو كێشانە چارەسەر بكرێن.