دوابەدوای پەیڕەوكردنی سیاسەتی وەزارەتی كشتوكاڵ و سەرچاوەكانی ئاو بە دانانی باج لەسەر هاوردەی بەرهەمی كشتوكاڵی و پەلەوەڕ لە دەرەوە بۆ ناو هەرێمی كوردستان، توانرا بڕی 51 ملیارو 288 ملیۆن و 550 هەزار دینار وەك داهات بۆ هەرێمی كوردستان دابین بكرێت، ئەنوەرعومەر قادر بەڕێوەبەری گشتی پلان و بەدواداچوون و وتەبێژی وەزارەتی كشتوكاڵ و سەرچاوەكانی ئاو دەربارەی ئەم هەواڵە جەختی لەوە كردەوە كە لە ماوەی 4 مانگدا واتا لە 15/4/2015 تاكو 15/8/2015، لە دانانی باج لەسەر سەوزە كە 108292 تەن بوو بڕی 27ملیارو 73 ملیۆن دینار بەدەست هاتووە، لەسەر میوە كە 41353 تەن بوو بڕی 14 ملیارو 473 ملیۆن و 550 هەزار دینار بەدەست هاتووە، لە سەر مریشك كە 26000 تەن بوو داهاتەكەی بریتی بوو لە بڕی 5 ملیارو 200 ملیۆن دینار، دەربارەی هێلكە كە 22000 تەن بوو بڕی 4 ملیارو 400 ملیۆن دینار بەدەست هاتووە، دەربارەی قارچك كە بڕەكەی 142 تەن بوو كە داهاتەكەی بریتی بوو لە 142 ملیۆن دینار، لە كۆتاییدا وتەبێژی وەزارەتی كشتوكاڵ و سەرچاوەكانی ئاو روونی كردەوە كە كۆی باجی بەدەستهاتوو لەم چوار مانگەدا گەیشتۆتە51 ملیارو 288 ملیۆن و 550 هەزار دینار.