لە پێناو كۆنتڕۆڵكردنی دیاردەی زێدەڕۆیی كردنی سەر زەوی و زاری كشتوكاڵ و دارستان و پاوانەكان لە سەرجەم ناوچەكانی هەرێمی كوردستاندا، وەزارەتی كشتوكاڵ و سەرچاوەكانی ئاو، لە كۆبوونەوەیەكدا بڕیاری دا كە بەتوندی و بە پێی یاساو رێنماییەكان لە رێی دادگاكانەوە سەرپێچیكاران رادەستی دادگا بكرێن، دكتۆر ئەنوەر عومەر قادر بەڕێوەبەری گشتیی پلان و بەدواداچوون وتەبێژیی وەزارەت لە لێدوانێكدا ئەمەی پشتڕاست كردەوەو ئاماژەی بەوە كرد كە لەلایەن وەزیری كشتوكاڵ و سەرچاوەكانی ئاوەوە دەسەڵات دابەزێنراوە بۆ نوێنەرانی بەشی یاسایی لە بەڕێوەبەرایەتییە گشتییەكانی كشتوكاڵ و بەڕیوەبەرایەتییەكانی دارستان و پاوان لە پارێزگاكانی هەرێمی كوردستان بە مەبەستی جووڵاندنی داواكاریی سزایی دژ بە زێدەڕۆكارانی سەر زەویی كشتوكاڵ و دارستانەكان بە هەماهەنگی لەگەڵ داواكاری گشتیی، وتەبێژی وەزارەت جەختی كردەوە كە تا ئێستا لە پارێزگای سلێمانی زیاتر لە 200 كەس دۆسێی زێدەڕۆیی بۆ كراوەتەوە، لە گەرمیان پتر لە 500 كەس و لە دهۆكیش لیژنەی سەر بە پارێزگاكە كە لە بەڕێز پارێزگار و نوێنەرانی كشتوكاڵ و دەزگا ئەمنییەكان پێكدێت بەردەوامە لە بەدواداچوون بۆ حاڵەتەكانی زێدەڕۆیی كردنی سەر زەویی كشتوكاڵ و دارستان و پاوانەكان، هەروەها سەبارەت بە پارێزگای هەولێر روونی كردەوە كە بەم زوانە لیژنەی پسپۆڕ دەست بەكار دەبێت، لە كۆتاییدا ئاماژەی بەوە كرد كە وەزارەتی كشتوكاڵ و سەرچاوەكانی ئاو لە بەدواداچوونی ئەم دیاردەیەدا بەردەوام دەبێت تاكو سنوورێك بۆ ئەو كەس و لایەنانە دابنرێت كە لە ئاكامی زێدەڕۆیی سەر زەویی و زارو دارستانەكان زیان بە كەرتی كشتوكاڵ و ژینگەو ئابووریی كوردستان دەگەیەنن.