ئەمڕۆ سێ شەممە بە ئامادەبوونی بەڕێز عەبدولستار مەجید وەزیری كشتوكاڵ و سەرچاوەكانی ئاو لیژنەی بەدواداچوونی كێشەكانی جووتیاران لە دیوانی وەزارەت، چاوی بە ژمارەیەك جووتیارو بەرهەمهێنانی كشتوكاڵی كەوت، لە كۆبوونەوەكەدا بەر لەوەی لیژنەكە گوێ لە ئامادەبووان بگرێت و لە داواكاری و كێشەكانیان بكۆڵێتەوە، سەرەتا وەزیری كشتوكاڵ و سەرچاوەكانی ئاو رۆشنایی خستە سەر خاڵە گرنگەكان و ئەو بڕیارانەی كە لە بەرژەوەندیی هاووڵاتیان دەرچوون بۆ بەرەنگاربوونەوەی هەر حاڵەتێكی نەخوازراو لە بڵاوبوونەوەی ئەنفلەوەنزای باڵندە، روونیشی كردەوە كە قەدەغەكردنی فرۆشتنی مریشكی زیندوو لەدوكان و سەر شەقامەكان مەبەست لێی بێ كاری كردنی كاسبكاران نییە، لەمەو دواش وەزارەت رێنمایی دەردەكات بە راوێژ لەگەل وەزارەتە پەیوەندیدارەكان بۆ رێكخستن و بە سیستەمكردنی ئەم كارە و لە داهاتوو ئەوانەی مۆڵەت وەردەگرن دەچنە ناو سیستەمی بە بازاڕكردنی مریشك كە وەزارەت لەئەستۆی دەگرێت و ئەو كاتە بۆیان هەیە مریشكی فرێش و بەستوو بفرۆشن هاوكات قەدەغەكردنی فرۆشتنی مریشكی زیندوو لەدوكان و سەر شەقامەكان لەئێستادا دوورە لە رێنمایە تەندروستییەكان و مەترسیی بڵاوبونەوەی ڤایرۆسی ئەنفلوەنزای باڵندەشی لێ دەكرێ، دواتر چەندین كێشە وداواكاری لەلایەن جووتیارانەوە خرانەڕوو لەوانە پەیوەست بە زەویی كشتوكاڵی و كێشەی تەسویەو تەملیكی زەوییەكان، هاوكات داواكاری جووتیارێك بە رێگەدان بە لێدانی بیر لە ناو شار بۆ مەبەستی پڕۆژەی تایبەت، لەم رووەوە وەزیری كشتوكاڵ و سەرچاوەكانی ئاو دووپاتی كردەوە كە ئەم جۆرە بیرلێدانە دەبێ رەزامەندیی وەزارەتی شارەوانی لەسەر بێت و پەیوەندیی بە وەزارەتمانەوە نییە، هاوكات چەندین كێشەو داواكاریی خرانە بەرباس و رێگەچارەیان بۆ دەست نیشانكرا.