بەڕێز عەبدولستار مەجید وەزیری كشتوكاڵ و سەرچاوەكانی ئاو بە یاوەریی بەڕێوەبەرانی گشتيی باخداری و دارستان و پلاندانان و بەدواداچوون پڕۆژەی كارگەی كوارگ(قارچك)ی لە دەشتی هەولێر و نزیك شارۆچكەی بنەسڵاوە بەسەركردەوە كە لەئێستادا لە قۆناخی دامەزراندایە، لەلایەن بەهادین ئەحمەد خاوەنی پڕۆژەكەو ئەندازیاری سەرپەرشتیارو كارمەندانەوە بەگەرمی پێشوازی كران، سەرەتا گوێی لە خاوەن پڕۆژەكە گرت كە كورتە باسێكی دەربارەی پڕۆژەكە خیتەڕوو، دواتر بە یەكەیەكە بەشەكاندا گەڕاو روونی كردەوە كە ئەمە پڕۆژەیەكی گرنگە كە لە كوردستان دادەمەزرێت و ئامادەیی خۆشی دووپاتكردەوە بۆ هاوكاریكردن و پشتیوانیكردن بەپێی توانا و دابینكردنی پێداویستییەكان و كارئاسنیكردن بۆ سەرخستنی ئەم كارگەیە. كارگەی قارچك كە تا ئێستا ناوی بۆ دانەنراوەو لە قۆناخی دامەزراندندایە لەسەر رووبەری 4 دۆنم زەوی دامەزراوەو لەلایەن كەرتی تایبەتەوە درووست دەكرێت، لە 21 هۆڵ پێكدێت و بەشەكانی دانانی تۆو پێگەیاندن و دواتر قۆناخی مامەڵەكردنی زانستی و بەستەنی و لە قووتوونان لەخۆدەگرێت، بە نیازیشن كارگەیەك بۆ كۆمپۆس درووست بكەن، قارچكەكە بە ماوەی 45 رۆژ ئامادەدەكرێت و رۆژانەش بەرهەمی كارگەكە دەگاتە نزیكەی 3 تەن كە بە قووتووكراوی رەوانەی بازاڕەكانی كوردستان دەكرێت.