بەڕێزعەبدولستار مەجید وەزیری كشتوكاڵ و سەرچاوەكانی ئاو پێشوازی كرد لە فەرهەدین یاجی راوێژكار لە بانكی نێودەوڵەتی، لە دیدارەكەدا كە بەڕێوەبەرانی گشتی دیوان و سەرچاوەكانی ئاو ئامادەی بوون،ئاماژە بەو گرێبەستە كرا كە بانكی نێودەوڵەتی لەگەڵ حكومەتی هەرێمی كوردستان لەرێی وەزارەتی پلاندانانەوە واژۆی كردووە تایبەت بە داڕشتن و هەڵسەنگاندنی سیاسەتی ئابووریی هەرێمی كوردستان، لەم رووەوە وەزیری كشتوكاڵ و سەرچاوەكانی ئاو وێڕای ئاماژەكردن بە گرنگیی ئەو گرێبەستە بە تایبەتیش كە كشتوكاڵ و ئاودێری بنەمایەكی سەرەكیی ئابووریی هەرێمی كوردستانە، بۆیە لە میانی دیدارەكەدا جەخت لەسەر ئەو خاڵە كرایەوە كە پەیوەستە بە پەرەپێدانی سیاسەتی كشتوكاڵیی هەرێم و چۆنێتیی دابین كردنی بودجە بۆ پڕۆژەكانی بەنداوو ئاودێری، لەم بارەوە بڕیاردرا كە لیژنەكانی هونەریی وەزارەت كۆبوونەوە بكات بۆ ئامادەكردنی پرۆپۆزەڵێكی تایبەت بە پڕۆژەكان تاكو دواتر بەدواداچوونی بەدوادا بكرێت، ئەمەو لە كۆتایی دیدارەكەدا هەردوولا جەختیان كردەوە لەسەر زیاتر هاوكاری و هەماهەنگیكردن بۆ سەرخستنی ئەم مەبەستەو كار ئاسانی بۆ ئیش و كاری لیژنە هاوبەشەكان.