ئەمڕۆ لیژنەی باڵای بەرەنگاربوونەوەی ئەنفلەوەنزای باڵندە كە بە فەرمانی سەرۆكایەتی ئەنجومەنی وەزیران پێكهاتووە، لە بینایەی وەزارەتی ناوخۆ كۆبوونەوەیەكی بە سەرپەرشتی بەڕێزعەبدولستار مەجید وەزیری كشتوكاڵ و سەرچاوەكانی ئاو سازكرد، لە كۆبوونەوەكەدا هەر یەك لە ئەندامانی لیژنەكە بەڕێزان كەریم شنگالی وەزیری ناوخۆ و دكتۆر رێكەوت حەمە رەشید وەزیری تەندروستی و نەورۆز مەولود وەزیری شارەوانی ئامادەی بوون سەبارەت بە سەرهەڵدانی ئەنفلەوەنزای باڵندە گفتوگۆی كرد دوای بڵاوبوونەوەوی نەخۆشیی ئەنفلەوەنزای باڵندە لە 32 وڵاتی جیهان و لەوانەش توركیا، هەروەها دەست نیشانكردنی ئەم نەخۆشییە لە مریشكی خۆماڵی لە 3 گوندی پارێزگای سلێمانی و بۆ رێگەگرتن لە بڵاوبوونەوەی ئەم نەخۆشییە ڤایرۆسییە لە هەرێمی كوردستان و بۆ پاراستنی گیانی هاووڵاتیان و سامانی پەلەوەڕ لە كۆبوونەوەكەدا لیژنەكە بڕیاری دا كە لایەنە پەیوەندیدارەكان ئەم خاڵانە جێبەجێ بكەن: 1- مریشكی كێڵگەكانی پەلەوەڕ بە پێی رێنمایی كوشتارگە تەنیا لە كوشتارگەی پەلەوەڕ و لەژێر سەرپەرشتی پزیشكی ڤێتێرنەری سەردەبڕدرێت و داواش لە هاووڵاتیان كرا كە پێویستە لەو كوشتارگایانە مریشك بكڕن. 2- قەدەغەكردنی فرۆشتنی مریشكی زیندوو لە بازاڕ و شەقام و كۆڵان و دوكانەكان. 3- داخستنی بازاڕەكانی پەلەوەڕی كێوی تا ئاگادارییەكی دیكە. 4- گواستنەوەی مریشكی زیندوو تا ئاگاداركردنەوەیەكی دیكە لە نێوان پارێزگاكان رادەگیرێت و پێویستە مریشكی كێڵگەكان لە نزیكترین كوشتارگەی پارێزگا سەرببڕدرێت. 5- چاودێریی وردی بواری تەندروستیی كێڵگەكانی پەلەوەڕ و پەلەوەڕی خۆماڵی بكرێت و لە كاتی سەرهەڵدانی نەخۆشی لە هەر ناوچەیەك بە پێی پلانی بەرەنگاربوونەوەی نەخۆشیی ئەنفلەوەنزای بڵندە مامەڵە دەكرێت. 6- دەبێت خاوەن پڕۆژەكانی پەلەوەڕ پابەندبن بە جێبەجێ كردنی مەرجەكانی تەندروستی و بایوسكیوریتی بۆ رێگەگرتن لە تووشبوونی پڕۆژەكانیان بەم نەخۆشییە، هەروەها خاوەن پەلەوەڕی خۆماڵی لە گوندەكان پێویستە رێگە بگرن لە تێكەڵبوونی پەلەوەڕی خۆماڵی و باڵندە كێوییەكان و گشت مەرجەكانی خۆپاراستن رەچاوبكرێت. 7- گرنگیدان بە رێنمایی و هۆشیاركردنەوەی هاووڵاتیان بۆ چۆنێتیی خۆپاراستن لەم نەخۆشییە، كە پێویستە میدیاكانیش رۆڵی بەرچاو لەم رووەوە ببینن. 8- هەماهەنگی تەواو لە نێوان وەزارەتەكانی پەیوەندیدار هەبێت و لیژنەی باڵای ئەنفلەوەنزای باڵندە هەفتانە كۆبوونەوەی خۆی بكات. 9- لەهەر پارێزگایەك لیژنەی باڵای ئەنفلەوەنزای باڵندە بە سەرۆكایەتی پارێزگار و نوێنەرایەتی لایەنە پەیوەندیدارەكان پێكبهێنرێت بۆ بەدواداچوون و سەرپەرشتی كۆنتڕۆڵی ئەم نەخۆشییە. 10- وەزارەتەكانی كشتوكاڵ و سەرچاوەكانی ئاو، تەندروستی، ناوخۆن شارەوانی و گەشتوگوزار، دەستەی باڵای ژینگە بەرپرس دەبن لە جێبەجێكردنی ئەم رێنماییانە. 11- قەدەغەكردنی راوكردنی باڵندەی كێوی. 12- پاككردنەوەی ئۆتۆمبیلی هاتوو بۆ خاڵی ئیبراهیم خەلیل لە توركیاوە بە دەرمانی (فیركۆن s). 13- چاودێریكردنی زیاتری كێڵگەكانی پەلەوەڕ. 14- دابینكردنی بودجەیەكی پێویست یۆ ئەم مەبەستە. 15- بەشداری كردنی نوێنەرانی وەزارەتی كشتوكاڵ و سەرچاوەكانی ئاو لە مەفرەزەكانی تایبەت بەم بوارە كە نوێنەرانی ناوخۆو شارەوانی و تەندروستیشیان تێدایە. 16- پێویستە ئەم خاڵانەی سەرەوە بە تەواوی جێبەجێ بكرێن.