بە بۆنەی 8ی مارس رۆژی جیهانیی ئافرەتان بەڕێز عەبدولستار مەجید وەزیری كشتوكاڵ و سەرچاوەكانی ئاو لە دیوانی وەزارەت لەگەڵ كارمەندان و فەرمانبەرانی ئافرەتی نێو وەزارەت كۆبۆوە، لە كۆبوونەوەكەدا كە بەڕێوەبەرانی گشتی وەزارەت ئامادەی بوون، سەرەتا وەزیری كشتوكاڵ و سەرچاوەكانی ئاو پیرۆزبایی ئەو رۆژەی لە فەرمانبەرانی ئافرەت كردو هیوای تەمەن درێژی و سەركەوتنی لە ژیان وەزیفی و ئاسایی بۆ خواستن، دواتر بە تێروتەسەلی باسی لە رۆڵی ئافرەت كرد لەنێو خێزان و كۆمەڵگەداو ئەو ئەركە قورسەی لەسەر شانییەتی لە پەرەوەردەكردنی نەوەی نوێ و بەردەوامیی كاروانی ژیان، ئینجا باسی لە ئەرك و مافەكانی ئافرەتان كرد كە لە قورئانی پیرۆزو فەرموودەكانی پێغەمبەر (دخ)دەست نیشان كراوەو لەم رووەوە جەختی لەوە كردەوە كە ئافرەتان پێویستە خۆیان مافەكانیان بەدەست بێنن نەك پیاو پێیان ببەخشێت، لەم سۆنگەوە دووپاتی كردەوە كە هەردووكیان یەكسانن و خوای گەورە زڕۆر رێزی لە ئافرەت گرتووە و لەسەر پیاوانیش پێویستە مافیان زەوت نەكەن، چونكە ئەوانیش بەشدارن لە پێشخستنی رەوڕەوەی پێشكەوتنی كۆمەڵگا و لە هەموو روویەكەوە توانیویانە هەنگاو هەڵێنن لە سەرجەم بوارەكانی داهێنانی زانستی و رۆشنبیری و كۆمەڵایەتی و ئابووریدا، دواتر لە رێوڕەسمێكدا رێزی لە فەرمانبەرانی ئافرەت گرت و دیاریی بەسەردا دابەشكردن.