كێشەو گرفتەكانی كشتوكاڵی جووتیارانی قەزای مێرگەسۆر ناوەڕۆكی دیداری نێوان بەڕێز عەبدولستار مەجید وەزیری كشتوكاڵ و سەرچاوەكانی ئاو و بەڕێز غەفور ئەحمەد مەلا سوار قایمقامی قەزای مێرگەسۆر بوو بە ئامادەبوونی محەمەد رەشید بەڕێوەبەری كشتوكاڵی مێرگەسۆر و ژمارەیەك لە بەڕێوەبەرانی گشتیی وەزارەت، هاوكات جەخت لەسەر ئەو گرفتانە كرایەوە كە پەیوەست بوون بە داواكاری خاوەن پڕۆژەكانی پەلەوەر و پاڵپشتیكردنیان و مۆڵەتدان بە پڕۆژەكان، لەم رووەوە وەزیری كشتوكاڵ و سەرچاوەكانی ئاو دووپاتی كردەوە كە لە ئەنجومەنی راوێژكاریی وەزارەت ئاماژەمان بە چەندین رێنمایی كردووە و تێیدا بڕیاردرابوو ئەو پڕۆژانەی كە گونجاون مۆڵەتیان پێ بدرێت ئەوانەش كە مامناوەندین ئاسانكارییان بۆ بكرێت، ئەوانەیشی كە پێچەوانەی یاساو رێنماییەكانن مۆڵەتیان پێ نەدرێت، یەكێك لە داواكارییەكان بریتی بوو لە كردنەوەی كەڕەنتینێك لە سنووری دەڤەرەكە و لەم بارەوە وەزیر بڕیاری دا كە ئەم كەرەنتینە بكرێتەوە دوای ئەوەی كە شوێنێكی گونجاوی بۆ دەست نیشان دەكرێت، لە تەوەرێكی دیكەدا ئاماژە بە هەوڵی قەرەبووكردنەوەی جووتیاران و هەنگەوانان و خاوەن باخ و رەزەكان كرا كە بە هۆی بۆردومانی فڕۆكەكانی توركیا لە ناوچەكەدا سوتاون و رووبەڕووی زیان بوونەتەوە، لەم بارەوە جەختكرایەوە كە پشتیوانی لەم داوایە دەكرێت دوای تێپەڕاندنی قەیرانی دارایی كە لەئێستادا رووبەڕووی هەرێمی كوردستان بۆتەوە و دەرخستە بۆ ئەم هەنگاوە ئامادەبكرێت تاكو مافیان نەسووتێت، هەر لەم دیدارەدا داوای دروستكردنی چەند پۆندێك بۆ گلدانەوەی ئاوو سوود وەرگرتن لە ئاوی باران لەم دەڤەرە كرا وەزیری كشتوكاڵ و سەرچاوەكانی ئاو روونی كردەوە كە لە دەرفەتێكدا سەردانی ناوچەكە دەكات و لە نزیكەوە بە كێشەو داواكاریەكان ئاشنا دەبێت.