بێگەرد تاڵەبانى، وەزیری کشتوکاڵ و سەرچاوەکانى ئاو، لە دیوانى وەزارەت پێشوازى کرد لە ژمارەیەک جووتیارى سنوورى پارێزگاى هەولێر، کە بە مەبەستى گفتوگر کردن دەربارەى چەند کێشەیەکى تایبەت بە کەرتى کشتوکاڵ و ساغ کردنەوەى بەرهەمى گەنم و جۆ و گازاندە کردن لە کەمى پاڵپشتى حکومەت لە چارەسەر کردنى کێشەکانی جووتیاران سەردانى وەزارەتى کشتوکاڵیان کردبوو. لەمیانى دیدارەکەى ئەمرۆ (٢٩/١/٢٠٢٠)دا، وەزیرى کشتوکاڵ گوێی لە داواکاریی و گازاندەکانى جووتیاران گرت کە سەرەکیترینەکانیان بریتى بوو لە هەوڵدانى وەزارەت بۆ چارەسەر کردنى کێشەى وەرگرتنى گەنم و جۆ لە جووتیاران لە لایەن حکومەتى ناوەندییەوە و خەرجکردنى پارەى گەنمى ئەو چەند ساڵەى لاى حکومەتى عیراق ماوە. هەروەها جووتیاران داوایان کرد وەزارەتى کشتوکاڵ لە کاتى سەرهەڵدانى ئافاتە کشتوکاڵییەکاندا رۆڵى پێویستى خۆى بگێڕێت لە دەستنیشان کردنى نەخۆشییەکان و جۆرى دەرمان و قڕکەرى پێویست و دابین کردنى دەرمان و چارەسەرى پێویست. گلەییشیان لە رێکخراوى یەکێتى جووتیارن کرد بە وتەى ئەو جووتيارانە "یەکێتى جووتیاران نەیتوانیوە لە ئاست تموحى جووتیارانى کوردستان بێت". داوایشیان کرد وەزیرى کشتوکاڵ ئەوپەڕی هەوڵ بدات لەگەڵ وەزارەتى کارەبا بۆ دابین کردنى کارەبا بۆ ئەو بیرە نوێیانەى کە بە مەبەستى بەراوکردنى زەوییە پشتاوەکان هەڵکەنراون و کارەبایان بۆ دابین ناکرێت بە پاساوى ئەوەى فیدەرەکانى کارەبا لۆدى زۆریان لەسەرە. وەزیرى کشتوکاڵ داوایکرد سەرجەم داواکاریی و سەرنجەکانیان لە راپۆرتێکى نووسراودا بخەنە بەردەست وەزارەتى کشتوکاڵ بۆ ئەوەى بەدواداچوونى پێوست و بە گوێرەى تونا چارەسەرى کێشەکانیان بکرێت و وەڵامى سەرجەم ئەو داواکاریی و سەرنجانەى دایەوە کە جووتیاران لە دیدارەکەى ئەمڕۆدا خستیانە روو. لەو چوارچێوەیەدا بەرپرسانى وەزارەتەکەى راسپارد بەدواداچوونى پێویست بکەن بۆ هەڵسەنگاندنى ئاستى بەدەمەوەچوونى دامەزراوەکانى وەزارەت بۆ داواکاریی جووتیاران تایبەت بە دەستنیشان کردنى نەخۆشییە کشتوکاڵێیەکان و چۆنییەتى خەرج کردنى ئەو بڕە پارەیەى بەناوى کۆمەکى کشتوکاڵى و دابین کردنى بنەتۆو لە ساڵانى رابردوودا لە جووتیاران وەرگیراوە. هەروەک رایگەیاند کە سبەى بۆ گفتوگۆ کردن لەبارەى وەرگرتنەوەى پارەى گەنمى جووتیاران بەشداریی لە دانیشتنێکى پەرلەمانى کوردستان دەکات. لە چەند رۆژى داهاتووش دا سەردانى بەغداو دەکات بۆ گفتوگۆ کردن دەربارەى ئەو گرفتانە پەیوەست بە کەرتى کشتوکاڵ لە نێوان بەغدا و هەرێم بە هەڵپەسێردراوى ماوەنەتەوە.