لە میانی كۆبوونەوەی سێ شەممە لەگەڵ ژمارەیەك لە جووتیاراندا بەڕێز عەبدولستار مەجید وەزیری كشتوكاڵ و سەرچاوەكانی ئاو بە ئامادەبوونی لیژنەی بەدواداچوونی كێشەكانی سەر بە وەزارەت، سەرەتا پیرۆزبایی هاتنی ئەو مانگە پیرۆزەی لە جووتیاران كردو هیوای خواست كە ببێتە مایەی خۆشی و زیادكردنی بەرهەم و بەرەكەت بكەوێتە خەرمانی بەروبوومەكانیان و زیاتر هاندەر بێت بۆ بەتەنگەوەهاتنی كاركردن و داهاتی نیشتمانی، بە شێوەیەكی راستەوخۆش بەدواداچوونی كرد بۆ كێشەی وەرگرتنی گەنمی جووتیاران لە سایلۆكان، بۆ ئەم مەبەستەش پەیوەندی كرد بە لایەنی پەیوەندیدار و بەڵێنی چارەسەری كێشەی سەرەی رادەستكردنی گەنمی جووتیارانی وەرگرت كە لە هەندێ شوێندا رووبەڕووی گرفت دەبێتەوەو كاریگەریی دەكاتە سەر سرەی رادەستكردن و دواكەوتنی پڕۆسەكە، لەلای خۆشیانەوە جووتیارانی ئامادەبوو سوپاسگوزاری وەزیری كشتوكاڵ و سەرچاوەكانی ئاو بوون بۆ ئەم خەمخۆرییە، عەبدولستار مەجید جەختیشی كردەوە كە هەموو لایەك پێویستە هاوكاربن بۆ سەرخستنی پڕۆسەی كشتوكاڵ، دواتر گوێبیستی كێشەكان بوو، لەوانە كێشەی زەویی جووتیاران خرایەڕوو و باسیان لێوەكرا، چارەی گونجاویان بۆ دەست نیشان كرا، دووپاتیش كرایەوە كە چارەسەركردنی هەندێ لەو گرفتانە بە رێگەی لیژنەی پسپۆڕ و بە هاوكاریی یەكە ئیدارییەكان لە شارو شارۆچكەكان ئەنجام دەدرێت.